म. टा. प्रतिनिधी, पुणे
पुणे महापालिकेच्या विधी समितीच्या बैठकीला अध्यक्ष आणि उपाध्यक्ष हे दोघेही गैरहजर राहिल्याने त्याविरोधात विरोधी पक्षांनी तीव्र नाराजी व्यक्त केली. समितीच्या बैठकीला अनुपस्थित राहणाऱ्या या सदस्यांचा राजीनामा घेण्यात यावा, असे पत्र समितीचे सदस्य आणि राष्ट्रवादी काँग्रेसचे नगरसेवक योगेश ससाणे यांनी महापौर मुक्ता टिळक यांना दिले. तसेच, दोन्ही प्रमुख पदाधिकाऱ्यांच्या अनुपस्थिती ससाणे यांच्या अध्यक्षतेखाली विधी समितीची बैठक घेण्यात आली.
महापालिकेतील विधी समितीच्या नव्या पदाधिकाऱ्यांची निवड सहा महिन्यांपूर्वीच झाली आहे. समितीचे अध्यक्ष आणि उपाध्यक्ष अनेकदा बैठकीला गैरहजर असतात. यापूर्वी एक-दोनवेळा दोन्ही महत्त्वाचे पदाधिकारी या बैठकीला उपस्थित नव्हते. समितीचे इतर सदस्य आणि पालिकेतील विविध खात्यांचे अधिकारी बैठकीला वेळ काढून येत असतानाही अध्यक्ष-उपाध्यक्ष बैठकीकडे पाठ फिरवित असतील, तर त्यांना विषयांचे गांभीर्य समजत नसल्याची टीका ससाणे यांनी केली. संबंधित पदाधिकारी विधी समितीसाठी पुरेसा वेळ देऊ शकत नसतील, तर त्यांचे राजीनामे घेऊन त्यांना तातडीने पदावरून दूर करावे, अशी मागणी करणारे पत्र ससाणे यांनी महापौरांना दिले आहे. आचारसंहितेमुळे प्रलंबित असलेला पालिकेतील एका अधिकाऱ्याच्या पदोन्नतीचा ठराव ससाणे यांच्या अध्यक्षतेखाली झालेल्या बैठकीत मंजूर करण्यात आल्याचा दावा त्यांनी केला.