म. टा. प्रतिनिधी, पुणे
नवउद्योजकांना प्रोत्साहन देण्यासाठी आणि विविध क्षेत्रांतील भविष्यकालीन तंत्रज्ञानाचा वेध घेण्यासाठी पिंपरी-चिंचवड महापालिका, पिंपरी-चिंचवड स्टार्टअप इनक्युबेशन सेंटर व मराठा चेंबर ऑफ कॉमर्स, इंडस्ट्रीज अँड अॅग्रीकल्चर (एमसीसीआयए) यांच्या वतीने २८ व २९ फेब्रुवारी रोजी पिंपरी-चिंचवड ऑटो क्लस्टर येथे 'फेस्टिव्हल ऑफ फ्युचर' या अभिनव महोत्सवाचे आयोजन करण्यात आले आहे. या महोत्सवांतर्गत 'सिटिझन हॅकेथॉन', 'स्टार्टअप पिच फेस्ट', 'स्पीकर सीरिज' आणि प्रदर्शन अशा भरगच्च उपक्रमांत सहभागी होण्याची संधी पुणे व पिंपरी-चिंचवड परिसरातील नवउद्योजक आणि नागरिकांना मिळणार आहे.
पिंपरी-चिंचवड महापालिका आयुक्त श्रावण हर्डीकर आणि 'एमसीसीआयए'चे महासंचालक प्रशांत गिरबाने यांनी शुक्रवारी पत्रकार परिषदेत या महोत्सवाची माहिती दिली. 'पिंपरी-चिंचवडची वाढ वेगाने होत असून, वाहन उद्योगासह आता विविध क्षेत्रातील उद्योगांचा, आयटी क्षेत्राचा विस्तार होत आहे, स्टार्टअपही मोठ्या प्रमाणात सुरू होत आहेत. त्यांना प्रोत्साहन देण्यासाठी पिंपरी-चिंचवड स्मार्ट सिटीच्या कृती आराखड्यानुसार, 'स्टार्ट अप इनक्युबेशन सेंटर' स्थापन केले आहे. त्या अंतर्गत विविध क्षेत्रातील भविष्यकालीन तंत्रज्ञानाला आणि नवसंकल्पनांना व्यासपीठ देता यावे, यासाठी या आगळ्यावेगळ्या महोत्सवाचे आयोजन केले आहे,' असे सांगून हार्डीकर यांनी महोत्सवातील उपक्रमांची माहिती दिली.
महोत्सवात कळीच्या प्रश्नांवर कल्पक उत्तरे शोधण्यासाठी नागरिकांसाठी 'सिटिझन हॅकेथॉन' स्पर्धा होणार आहे. स्पर्धेतील विजेत्यांना रोख बक्षिसे दिली जाणार आहे. नवउद्योजकांना गुंतवणूकदार आणि खरेदीदारांसमोर 'स्टार्ट अप'चे सादरीकरण करण्यासाठी 'स्टार्टअप पिच फेस्ट' उपक्रम होणार आहे. या उपक्रमासाठी विविध महापालिकांचे महापौर, आयुक्त, स्मार्ट सिटीचे सीईओ, नगरपालिकांचे नगराध्यक्ष उपस्थित राहणार आहेत. याशिवाय महाविद्यालयीन तरुणाईला यशस्वी उद्योजकांसोबत संवाद साधण्यासाठी 'स्पीकर सीरिज' आणि स्टार्टअपची माहिती देण्यासाठी 'व्हिजिटर्स गॅलरी' आदी उपक्रमही होणार आहेत.
अधिकाधिक नागरिकांनी या महोत्सवात सहभागी व्हावे, असे आवाहन हार्डीकर आणि गिरबाने यांनी केले. महोत्सवाची माहिती www.festivaloffuture.com या वेबसाइटवर उपलब्ध आहे, असेही आयोजकांनी सांगितले.