म. टा. प्रतिनिधी, पुणे
डिजिटल जीवन प्रमाणपत्र काढताना बोटांचे ठसे (बायोमेट्रिक) अद्याप नोंदविले नसतील, किंवा नोंदणी झाली नसेल, अशा टपाल आणि दूरसंचार खात्यातील निवृत्ती वेतनधारकांसाठी येत्या सोमवारपासून डिजीटल जीवन प्रमाणपत्र मेळाव्याचे आयोजन करण्यात आले आहे. पोस्टाच्या पुणे स्टेशन येथील मुख्य कार्यालयासह शिवाजीनगर कार्यालय व बेलबाग चौकातील सिटी पोस्ट कार्यालयात येत्या २७ जानेवारीपासून १ फेब्रुवारीपर्यंत आणि बारामती मुख्य पोस्ट कार्यालयात ६ फेब्रुवारीपासून १२ फेब्रुवारी या कालावधीत हा मेळावा होणार आहे. पोस्ट आणि टेलिकॉम क्षेत्रातील जास्तीत जास्त निवृत्ती वेतनधारकांना डिजीटल जीवन प्रमाणपत्राच्या कक्षेत आणण्यासाठी या मेळाव्याचे आयोजन करण्यात आले आहे. मेळाव्यात अधिकाधिक निवृत्ती वेतनधारकांनी सहभागी व्हावे, असे आवाहन पोस्टाच्या पुणे ग्रामीण विभागाचे अधीक्षक बी. पी. एरंडे यांनी केले.