म. टा. प्रतिनिधी, पुणे
पुण्यातील जगप्रसिद्ध गणेशोत्सवाचा वेगळेपणा छायाचित्रांच्या माध्यमातून समोर यावा आणि छायाचित्रणाच्या कौशल्याला रसिकांची दाद मिळावी, यासाठी 'ड्रीम्स टू रिअॅलिटी' आणि 'वाइड विंग्ज मीडिया'च्या वतीने 'बाप्पाग्राफी २०१९' या विशेष स्पर्धा व प्रदर्शनाचे आयोजन करण्यात आले आहे.
'महाराष्ट्र टाइम्स कल्चर क्लब' या स्पर्धेचा 'कल्चरल पार्टनर' आहे. या स्पर्धेचे हे आठवे वर्ष असून, स्पर्धेला दर वर्षी वाढता प्रतिसाद मिळत आहे. पुणे, सांगली, कोल्हापूर, औरंगाबाद, नाशिक, कोकण, नवी मुंबई; तसेच मुंबईतील उपनगरांतूनही या स्पर्धेला प्रतिसाद मिळत आहे. स्पर्धेत सहभागी होण्यासाठी शेवटची तारीख २० सप्टेंबर २०१९ असून, WWW.WIDEWINGSMEDIA.COM या संकेतस्थळावर स्पर्धेसाठीचे अर्ज उपलब्ध करून देण्यात आले आहेत. स्पर्धेतील छायाचित्रांचे प्रदर्शन २७, २८ आणि २९ सप्टेंबर रोजी घोले रस्त्यावरील राजा रवि वर्मा कलादालन येथे आयोजिण्यात येणार आहे.
'मानाचे गणपती, आकर्षक देखावे, ढोल-ताशा पथके, मिरवणुकीतील वैविध्य, सांस्कृतिक कार्यक्रम, आकर्षक मूर्ती यामुळे सर्वांचे लक्ष पुण्याच्या गणेशोत्सवाकडे असते. अनेक जण हे वैविध्य आपल्या कॅमेऱ्यातून टिपतात. त्याच सर्व गोष्टी 'बाप्पाग्राफी'च्या माध्यमातून सर्वांपर्यंत पोहोचवण्याचा प्रयत्न म्हणून या स्पर्धेचे आयोजन केले जाते. हौशी आणि व्यावसायिक छायाचित्रकारांना व्यासपीठ उपलब्ध करून देणे हा स्पर्धेच्या आयोजनामागील हेतू आहे,' असे संयोजकांनी सांगितले. यासोबतच 'बाप्पास्टोरी'मध्येही सहभागी होता येणार आहे. यात तीन फोटो मिळून एकसंध गोष्ट मांडता येणार आहे. संपर्क : ९९३०२९४६६०, ७४४७४०५८४४.