जिल्ह्यात आता ‘ई-पीएचसी’

पेशंटच्या आजाराची माहिती ‘ऑनलाइन’

म. टा. प्रतिनिधी, पुणे
पुणे जिल्ह्यातील प्राथमिक आरोग्य केंद्रांमध्ये उपचाराला येणाऱ्या पेशंटची माहिती आता कागदाऐवजी आता संगणकावर नोंदविली जाणार आहे. जिल्ह्यातील सर्व आरोग्यकेंद्रे एकमेकांना जोडण्यात येणार असून त्यामुळे ‘ई पीएचसी’चा प्रायोगिक प्रकल्प राबविण्यात येणार आहे. जिल्ह्यातील जुन्नर, बारामती आणि इंदापूर तालुक्यातील आरोग्य केंद्रामध्ये हा प्रयोग राबविला जाईल.

जिल्हा परिषदेच्या बांधकाम व आरोग्य विभागाचे सभापती प्रवीण माने यांनी पत्रकार परिषदेत ही माहिती दिली. त्या वेळी जिल्हा आरोग्य अधिकारी डॉ. दिलीप माने उपस्थित होते. ‘पुणे जिल्ह्यात ९६ प्राथमिक आरोग्य केंद्रे आहेत. आतापर्यंत पेशंट उपचाराला गेल्यानंतर त्याचा आजार, उपचार, तसेच औषधांच्या नोंदी या कागदावर ठेवल्या जात होत्या. पेशंटला ही कागदपत्रे सांभाळावी सांभाळावी लागत होती. त्याशिवाय आरोग्य केंद्रांना देखील पेशंटचे रेकॉर्ड ठेवण्यासाठी विशेष प्रयत्न करावे लागत होते. नोदींचे काम अधिक सुकर होण्यासाठी जिल्हा परिषदेच्या आरोग्य विभागाने हा प्रायोगिक प्रकल्प राबविण्यास सुरुवात केली आहे.

उपचारांसाठी प्राथमिक आरोग्य केंद्रात येणाऱ्या पेशंटची माहिती आता कागदावर न घेता संगणकावर नोंदविली जाईल. त्यामुळे कोणताही पेशंट दुसऱ्यांदा कितीही कालावधीनंतर आला तरी त्याच्या आजाराची माहिती डॉक्टरांना थेट संगणकावर क्लिक करताच कळेल. पेशंटच्या आजाराची माहिती संकलितही केली जाईल. आजारानुसार कोणती औषधे दिली, कोणते उपचार केले याची माहिती देखील नोंदविली जाईल. ही माहिती नोंदविण्यापूर्वी पेशंटचे स्वतंत्र अकाउंट उघडून त्या वेळी त्याच्या अंगठ्याचा ठसा (थंब इम्प्रेशन) घेतला जाईल. त्याला आधार क्रमांक जोडला जाईल. त्यामुळे संबंधित पेशंट पुन्हा उपचारांसाठी आल्यास त्याच्या थंब इम्प्रेशनद्वारे त्याचा माहितीसाठा खुला करणे शक्य होणार आहे,’ अशी माहिती जिल्हा परिषदेचे बांधकाम व आरोग्य सभापती प्रवीण माने आणि जिल्हा आरोग्य अधिकारी डॉ. दिलीप माने यांनी दिली. जुन्नर, बारामती आणि इंदापूर तालुक्यात प्रायोगिक तत्त्वावर प्रकल्प राबवला जाईल. तेथे तो यशस्वी झाल्यास जिल्ह्यातील ९६ प्राथमिक आरोग्य केंद्रांमध्ये त्याची अंमलबजावणी करण्याचा जिल्हा परिषदेचा मानस आहे.

दुसऱ्या गावातही मिळेल माहिती

संगणकावर माहिती संकलित केल्याने एका गावामध्ये कोणत्या आजाराचे किती पेशंट आहेत याची माहिती सहज कळेल. त्यानंतर जिल्ह्यातील सर्व प्राथमिक आरोग्य केंद्रे एकमेकांना ऑनलाइनद्वारे जोडण्यात येणार आहे. त्यामुळे एखाद्या गावातील पेशंट दुसऱ्या गावातील आरोग्य केंद्रात गेल्यास तेथेही त्याची माहिती सहज उपलब्ध होणार आहे, असेही या वेळी सांगण्यात आले.