म. टा. वृत्तसेवा, बारामती
इस्रोकडून १५ जुलैला 'चांद्रयान २'चे प्रक्षेपण होणार आहे. या गरुडझेपेसाठी पहिल्या टप्प्यातील महत्त्वाची 'बूस्टर मोटर केसिंग' पुणे जिल्ह्यातील इंदापूरमधील वालचंदनगर कंपनीच्या अभियंत्यांनी 'इस्रो'च्या सूचनेनुसार तयार केली आहे. 'चांद्रयान २'च्या गरुडझेपेसाठी वालचंदनगरचा सिंहाचा वाटा आहे. कुठल्याही क्षेपणास्त्राला अंतराळात झेपावण्यासाठी प्रथम स्टेजमध्ये 'बूस्टर' प्रणाली महत्त्वाची असते.
भारतीय अंतराळ संशोधन संस्थेने (इस्रो) आपल्या महत्त्वाकांक्षी मिशनबद्दल नुकतीच घोषणा केली आहे. १० वर्षांत दुसऱ्यांदा चांद्रयान मोहीम पूर्ण करणार असल्याने संपूर्ण जगाचे लक्ष लागले आहे. 'चांद्रयान २'च्या साह्याने इस्रोचे वैज्ञानिक चंद्राच्या पृष्ठभागाला अतिशय बारीक नजरेने पाहणी करून संशोधन करणार आहे. यात वालचंदनगर इंडस्ट्रीजने २००२-२००३ मध्ये या प्रक्षेपण वाहनासाठी काम सुरू केले होते. 'चांद्रयान २'साठी अत्यंत महत्त्वाचे असलेले 'बूस्टर' प्रणालीसाठी 'एस २०० मोटर केसिंग', तर 'जीएसएलव्ही मार्क ३'साठी 'एस २०० फ्लेक्स नोजल कंट्रोल टँकेज' वालचंदनगरच्या अभियंत्यांनी 'इस्रो'च्या सूचनेनुसार विकसित करून पुरवले आहे. बुस्टरमध्ये घनरूपातील इंधन असते. या इंधनाच्या जोरावर यान अवकाशात पाठवले जाते. यानाला हवेत दिशा देण्यासाठी लागणारी एस २०० फ्लेक्स नोझल कंट्रोल टँकेज यंत्रणाही वालचंदनगरच्या अभियंत्यांनी इस्रोच्या शास्त्रज्ञांच्या मदतीने विकसित केली आहे. उच्च क्षमता असणारा भारत जगातील पाचवा देश ठरला आहे. इस्राने अंतराळ मोहिमा आखत देशाचा लौकिक वाढवला आहे. अशी माहिती कंपनी व्यवस्थापनाने दिली आहे.
वालचंद उद्योग समूह १९७३-७४ पासून इस्रोच्या सहकार्याने अवकाश संशोधन क्षेत्रात काम करत आहे. देशाच्या सुरक्षा व विकासासाठी काम सुरू आहे. डिफेन्स, न्यूक्लिअर, 'एरोस्पेस'मध्ये अधिक लक्ष केंद्रित केले आहे. आण्विक पाणबुडीचे महत्त्वाचे भाग बनवण्याचे काम कंपनी करत आहे.
\B- जी. के. पिल्लई, \Bव्यवस्थापक संचालक, वालचंदनगर