पासपोर्ट अदालत २३ नोव्हेंबरला

पुणे : विविध कारणांमुळे प्रलंबित राहिलेल्या पासपोर्ट अर्जांची प्रक्रिया पूर्ण करण्यासाठी पुणे पासपोर्ट कार्यालयातर्फे येत्या २३ नोव्हेंबरला पासपोर्ट अदालत आयोजित करण्यात आली आहे. सेनापती बापट रोडवरील पुणे विभागीय पासपोर्ट कार्यालयामध्ये दुपारी १० ते १ या वेळेत ही अदालत होणार आहे.

अपुरी कागदपत्रे, अर्जामध्ये दिलेली माहिती आणि पोलिस व्हेरिफिकेशनमध्ये फरक आढळून आल्याने अशा विविध कारणांमुळे १५ सप्टेंबर २०१६पर्यंत प्रलंबित राहिलेल्या पासपोर्ट अर्जांची प्रक्रिया पूर्ण करण्यासाठी अदालत आयोजित करण्यात आली आहे. मात्र यात सहभागी होण्यासाठी अपॉइंटमेंट असणे बंधनकारक आहे.

यामध्ये पुणे, सोलापूर, अहमदनगर, सातारा, सांगली, कोल्हापूर येथील अर्जदारांना सहभागी होता येणार आहे. अर्जदारांनी passportadalat@gmail.com या ई-मेलवर संपूर्ण नाव, अर्ज क्रमांक, संपर्क क्रमांक लिहून पाठविणे अपेक्षित आहे. ज्यांना ईमेल शक्य नाही, त्यांनी पासपोर्ट कार्यालयाला अर्ज पाठवावा. ई-मेल अथवा पत्र पोहोचण्यासाठी २१ नोव्हेंबर ही अंतिम तारीख आहे, अशी माहिती पुणे विभागीय पासपोर्ट अधिकारी अतुल गोतसुर्वे यांनी दिली.