म. टा. प्रतिनिधी, पिंपरी
पुण्यातील शिवाजीनगरमधील रहिवासी असलेल्या करोनाबाधित महिलेचा पिंपरी-चिंचवड महापालिकेच्या वायसीएम रुग्णालयात बुधवारी (सहा मे) मृत्यू झाला. त्यामुळे शहरातील करोनाबाधितांच्या मृत्यूंची संख्या सहा झाली आहे. करोनाची लागण झालेल्यांची संख्या १५२ वर पोहोचली आहे.
पुण्यातील शिवाजीनगरमध्ये वास्तव्यास असलेल्या एका महिलेला करोनाची लागण झाली होती. त्यांच्यावर 'वायसीएम'मध्ये उपचार चालू होते. त्या दरम्यान त्यांचा मृत्यू झाला. प्रशासकीय नोंदीनुसार आजपर्यंत पिंपरी-चिंचवडमधील तीन आणि पुण्यातील परंतु या ठिकाणी उपचार घेत असलेले तीन अशा एकूण सहा जणांचा करोनामुळे मृत्यू झाला आहे.
दरम्यान, मोशी येथील संजय गांधीनगर परिसरातील पाच युवकांसह पिंपळे गुरव आणि चिंचवड येथील आठ जणांचे रिपोर्ट बुधवारी पॉझिटिव्ह आले. महापालिका हद्दीबाहेरील एका रुग्णाचाही यामध्ये समावेश आहे. शहरातील १४२ आणि महापालिका हद्दीबाहेरील दहा अशा १५२ जणांना आजर्यंत करोनाची लागण झाल्याचे स्पष्ट झाले असून, ६० जण करोनामुक्त होऊन घरी परतले आहेत.
महापालिका प्रशासनाने मंगळवारी (पाच मे) २०४ करोना संशयितांचे नमुने तपासणीसाठी एनआयव्ही आणि 'नारी'कडे पाठविले होते. त्याचे काही रिपोर्ट आले आहेत. यामध्ये २१ ते २८ वयोगटातील पाच युवक आणि एका ५० वर्षीय पुरुषाचा समावेश आहे; तर २५ वर्षीय आणि महापालिका हद्दीबाहेरील रहिवासी असलेल्या २८ वर्षीय अशा दोन महिलांचेही रिपोर्ट पॉझिटिव्ह आले आहेत. त्यातील सात जणांवर भोसरीतील रुग्णालयात; तर एकावर वायसीएम रुग्णालयात उपचार चालू आहेत.