म. टा. प्रतिनिधी, पिंपरी
पिंपरी-चिंचवड महापालिकेतर्फे निगडीतील महापालिकेच्या मधुकर पवळे शाळा इमारतीची डागडुजी करण्यात येणार आहे. त्यासाठी सुमारे ३० लाखांहून अधिक खर्च येणार आहे. अत्यंत जुन्या आणि धोकादायक असलेल्या इमारतींमध्ये या शाळेचा समावेश असल्याने हा निर्णय घेण्यात येणार आहे.
प्रभाग क्रमांक १३ निगडीतील सेक्टर २२मध्ये पिंपरी-चिंचवड महापालिकेची मधुकर पवळे शाळा आहे. या शाळेची इमारत ३० वर्षे जुनी असून, या इमारतीचे स्ट्रक्चरल ऑडिट करण्याचे आदेश देण्यात आले होते. त्यानुसार स्ट्रक्चरल ऑडिट अहवाल सादर झाला. त्यात ही इमारत व्यापक स्वरूपात दुरुस्त केल्यानंतरच ती वापरण्यास योग्य ठरणार आहे, अन्यथा ही इमारत धोकादायक ठरू शकते, असे नमूद केले आहे. या अहवालानुसार महापालिका 'फ' क्षेत्रीय कार्यालय स्थापत्य विभागाने २२ ऑगस्ट २०१९ रोजी शाळा इमारतीचा वापर तत्काळ बंद करावा, असा प्रस्ताव पाठविला.
त्यावर महापालिका आयुक्त श्रावण हर्डीकर यांनी या शाळा इमारतीचा वापर बंद केल्यास शाळांची पर्यायी व्यवस्था करण्याबाबत शिक्षण मंडळाकडे अभिप्राय मागितला. त्यावर शाळेच्या बाजूच्या नवीन इमारत आणि प्रार्थना हॉलमध्ये स्थलांतरित करणे शक्य असल्याचे मंडळातर्फे कळविण्यात आले. मात्र, ही शाळा 'रेड झोन'मध्ये असल्याने या शाळेच्या इमारतीचे नवीन बांधकाम करता येणे शक्य नाही. स्ट्रक्चरल ऑडिटर केबीपी सिव्हील इंजिनीअर्स सर्व्हिसेस यांनी डागडुजीद्वारे जुन्या इमारतीची दुरुस्ती होऊ शकते, अशी शिफारस केली आहे. या कामाचे अंदाजपत्रक तयार करण्यात आले असून, त्यासाठी सुमारे ३० लाख रुपये खर्च अपेक्षित आहे.
मात्र, प्रत्यक्ष काम सुरू असताना त्या खर्चात वाढ होऊ शकते. या कामाचा सन २०१९-२०च्या अंदाजपत्रकात समावेश नसून, तो करणे आवश्यक आहे. त्याला नगरसेवकांनीदेखील हरकत घेतलेली नाही. त्यामुळे या शाळा इमारत दुरुस्तीच्या कामासाठी लागणारी रक्कम 'स्थापत्यविषयक काम करणे' या लेखाशीर्षकांतर्गत ५० लाख इतक्या रकमेची प्रशासकीय मान्यता आणि २० लाख इतकी तरतूद 'प्रभाग क्रमांक १३'मधील धर्मवीर संभाजीराजे क्रीडासंकुâल विकसित करणे', या कामाच्या 'स्थापत्यविषयक कामे करणे' या लेखाशीर्षकावरून वर्ग करण्यात येणार आहे. स्थायी समितीने त्यास मान्यता दिली.