'पुणे रस्ते सुरक्षा मोहिमे'अंतर्गत स्वयंसेवी संस्थांची मागणी
म. टा. प्रतिनिधी, पुणे
शहरातील एकूण रस्ते अपघातांमध्ये पादचारी आणि दुचाकीचालक दगावण्याचे प्रमाण ८५ टक्के असल्याने त्यांच्या सुरक्षिततेसाठी पुढील वर्षीच्या अर्थसंकल्पात (२०२०-२१) विविध उपाययोजनांसाठी विशेष तरतूद करण्याची मागणी स्वयंसेवी संस्थांनी केली आहे. महापौरांच्या 'पुणे रस्ते सुरक्षा मोहिमे'अंतर्गत वाहतूक सुधारणांसाठी कार्यरत असलेल्या चार संस्थांनी या सदंर्भातील सविस्तर पत्रच महापालिका आयुक्त सौरभ राव यांना पाठविले आहे.
पादचारी आणि दुचाकी वाहनचालकांच्या सुरक्षिततेसाठी २०२०-२१ च्या अर्थसंकल्पात १७ कोटी रुपयांची तरतूद करण्याची मागणी त्यांनी केली आहे. यामध्ये पादचाऱ्यांसाठी वाहतूक नियंत्रक दिवे (~ ३.५ कोटी), दुभाजक असलेले रस्ते ओलांडण्यासाठी आवश्यक सुविधा (~ १२ कोटी), अपघातप्रवण रस्त्यांवर सीसीटीव्ही (~ १ कोटी) आणि रस्ते सुरक्षा मोहिमेचा प्रसार (~ ५० लाख) अशा विविध उपाययोजनांकरिता पालिकेने आर्थिक तरतूद करण्याचा आग्रह आयुक्तांकडे धरण्यात आला आहे. सेव्ह पुणे ट्रॅफिक मूव्हमेंट (एसपीटीएम), परिसर, सेफ रोड फाउंडेशन (एसआरएफ), सेंटर फॉर एनव्हायर्नमेंट एज्युकेशन (सीईई) आणि सेंटर फॉर डेव्हलपमेंट स्टडीज् अँड अॅक्टिव्हिटीज (सीडीएसए) या पाच संस्थांनी या प्रकल्पांसाठी निधी उपलब्ध झाल्यास शहरातील अपघाती मृत्यू रोखण्याच्या दृष्टीने महापालिका प्रयत्न करत असल्याने दिसून येईल, अशी अपेक्षा व्यक्त केली आहे.
रस्ते ओलांडताना होणाऱ्या अपघातांमध्ये अनेक पादचाऱ्यांचा दुर्दैवी मूत्यू होतो. त्याला आळा घालण्यासाठी शहरातील सर्व चौकांमध्ये पादचारी नियंत्रक दिवे बसविण्याची गरज आहे. शहरातील जुन्या वाहतूक नियंत्रक दिव्यांमध्ये पादचाऱ्यांना रस्ता ओलांडण्यासाठीच्या दिव्यांची सोय उपलब्ध नाही. त्यामुळे जुन्या दिव्यांच्या जागी नवे दिवे लावण्याची नितांत गरज असल्याचे मत 'एसपीटीएम'च्या हर्षद अभ्यंकर यांनी मांडले. दुभाजक असणाऱ्या रस्त्यांवरही वाहनांचा वेग जास्त असल्याने तेथे पादचाऱ्यांना रस्ता ओलांडण्यासाठी सुविधा निर्माण केल्या जाव्या, असेही त्यांनी सुचविले.
'महापालिकेच्या पादचारी धोरणानुसार दोन सिग्नलदरम्यान रस्ता ओलांडण्यासाठी पादचाऱ्यांकरिता चांगल्या क्रॉसिंगची गरज आहे. पादचारी विशिष्ट ठिकाणीच रस्ता ओलांडत असतील, तर वाहनचालकांना ते सहज दिसू शकतील. त्यानुसार सुविधा निर्माण कराव्या', अशी मागणी परिसरच्या रणजित गाडगीळ यांनी केली. चांदणी चौक ते कात्रज "बायपास" रस्ता, कात्रज-कोंढवा रस्ता, सोलापूर रस्ता, हडपसर-फुरसुंगी रस्ता अशा काही वर्दळीच्या रस्त्यांवर प्राणांतिक अपघातांचे प्रमाण प्रचंड आहे. या रस्त्यांचे सीसीटीव्ही चित्रीकरण केल्यास अपघातांचे नेमके कारण कळून त्यानुसार उपाययोजना करता येतील, असेही सूचित करण्यात आले आहे.
शहरातील सर्व शैक्षणिक संस्था, खासगी कंपन्या आणि सर्व नागरिकांपर्यंत पोहोचण्यासाठी 'पुणे रस्ता सुरक्षा मोहिमे'चा मोठ्या प्रमाणावर प्रसार होणे गरजेचे असल्याचे मत सीईईच्या संस्कृती मेनन यांनी मांडले.
प्रमुख सूचना
- सर्व चौकांत पादचारी नियंत्रक दिवे बसवा.
-पादचाऱ्यांना रस्ता ओलांडण्याची सुविधा हवी.
-अपघातांची संख्या मोठी असलेल्या रस्त्यांवर चित्रीकरण करून उपाययोजना करा.
-रस्ते सुरक्षा मोहिमेचा प्रसार करा.