निमंत्रण पत्रिकेतील नावांवरून नवा वाद

सावरकर, बाळासाहेबांच्या चित्राचे उद्या अनावरण

म. टा. प्रतिनिधी, पिंपरी

स्वातंत्र्यवीर विनायक दामोदर सावरकर आणि शिवसेनाप्रमुख बाळासाहेब ठाकरे यांचे तैलचित्र उद्या, रविवारी (२८ मे) राज्याचे शिक्षणमंत्री विनोद तावडे यांच्या हस्ते पिंपरी-चिंचवड महापालिका सभागृहात बसविण्यात येणार आहे. तसेच नवी सांगवी येथील उड्डाणपुलाचेही उद् घाटन तावडे यांच्या हस्ते होणार असल्याची माहिती महापौर नितीन काळजे यांनी पत्रकार परिषदेत दिली. दरम्यान, या कार्यक्रमाची निमंत्रण पत्रिका तयार करताना नवी सांगवी येथील नगरसेवकांऐवजी अन्यच नगरसेवकांची नावे पत्रिकेत छापण्यात आल्याने काही नगरसदस्यांनी प्रशासनाला
शुक्रवारी धारेवर धरले.
उपमहापौर शैलजा मोरे, सत्तारूढ पक्षनेते एकनाथ पवार, स्थायी समिती अध्यक्षा सीमा सावळे, क्रीडा समितीचे सभापती लक्ष्मण सस्ते, नगरसेविका झामाबाई बारणे आदी या वेळी उपस्थित होते. पिंपरी-चिंचवड महापालिकेत भाजपची सत्ता येताच पहिल्याच सर्वसाधारण सभेत स्वातंत्र्यवीर सावरकर आणि शिवसेना प्रमुख बाळासाहेब ठाकरे यांचे तैलचित्र लावण्याचा निर्णय घेण्यात आला आहे. रविवारी २८ मे रोजी सावरकरांची जयंती आहे. जयंतीच्या दिवशीच पालिका सभागृहात तैलचित्र लावण्याची मागणी अखिल भारतीय ब्राह्मण महासंघाच्या शिष्टमंडळाने केली होती, असे एकनाथ पवार म्हणाले. पिंपरी-चिंचवड महापालिकेच्या प्रभाग क्रमांक ३१ नवी सांगवी येथील महात्मा ज्योतीबा फुले उड्डाण पुलाचे व भुयारी मार्गाचेही शिक्षण मंत्री विनोद तावडे यांच्या हस्ते रविवारी सकाळी अकरा वाजता लोकार्पण होणार असल्याची माहिती महापौर काळजे यांनी
यावेळी दिली.
तैलचित्र बसविण्याचा कार्यक्रम हा रविवारी दुपारी एक वाजता महापालिकेच्या यशवंतराव चव्हाण सभागृहात होणार आहे. कार्यक्रमाच्या अध्यक्षस्थानी महापौर नितीन काळजे असणार आहेत. पुण्याचे पालकमंत्री गिरीश बापट, खासदार शिवाजीराव आढळराव, श्रीरंग बारणे, अमर साबळे, आमदार लक्ष्मण जगताप, महेश लांडगे, गौतम चाबुकस्वार, प्रांत संघचालक सुरेश जाधव, विरोधी पक्षनेते योगेश बहल, आयुक्त श्रावण हर्डीकर आदी उपस्थित राहणार आहेत.
‘निमंत्रण हवे’
शिवसेनाप्रमुख बाळासाहेब ठाकरे यांच्या तैलचित्र अनावरण सोहळ्याला ठाकरे कुटुंबीयांतील महत्त्वाची व्यक्ती अथवा शिवसेनेच्या वरिष्ठ नेत्यांना निमंत्रित करण्याची मागणी शिवसेनेचे शहरप्रमुख व पालिकेतील गटनेते राहुल कलाटे यांनी महापौर आणि आयुक्तांकडे केली आहे. याबाबत कलाटे यांनी महापौर नितीन काळजे आणि आयुक्त श्रावण हर्डीकर यांना निवेदन
दिले आहे.