फुले, शाहू, आंबेडकर विचार संमेलन भोरमध्ये

२६, २७ नोव्हेंबरला आयोजन

म. टा. प्रतिनिधी, भोर

डॉ. बाबासाहेब आंबेडकर यांच्या शतकोत्तर रौप्यमहोत्सवी जयंतीवर्षाच्या निमित्ताने भोरमध्ये २६ व २७ नोव्हेंबर रोजी दुसरे ‘फुले, शाहू, आंबेडकर विचार प्रसार साहित्य संमेलन’ आयोजित करण्यात आले आहे. स्वागताध्यक्ष आमदार संग्राम थोपटे यांनी ही माहिती दिली. या वेळी डॉ. प्रदीप पाटील, ज्ञानोबा घोणे, डॉ. रोहिदास जाधव आणि सदस्य उपस्थित होते.

भोरमधील फुले, शाहू, आंबेडकर विचार प्रसारक मंडळ, सावित्रीबाई फुले पुणे विद्यापीठातील डॉ. बाबासाहेब आंबेडकर अध्यासन व संशोधन केंद्र, अंधश्रद्धा निर्मूलन समितीची भोर शाखा, अनंतराव थोपटे विद्यालय आणि समविचारी संस्था-संघटना यांच्यातर्फे या संमेलनाचे आयोजन केले जाणार आहे. छत्रपती शिवाजी महाविद्यालयाच्या भव्य प्रांगणात हे संमेलन होणार आहे.

२६ नोव्हेंबरला दुपारी दोन वाजता संविधान रॅली काढली जाणार असून, ग्रंथ प्रदर्शनाचे उद्घाटन पत्रकार राही भिडे यांच्या हस्ते होणार आहे. सायंकाळी सात वाजता कविसंमेलन होणार आहे. २७ नोव्हेंबरला सकाळी नऊ वाजता आंबेडकरी जलसा झाल्यानंतर डॉ. भालचंद्र मुणगेकर, संमेलनाध्यक्ष डॉ. श्रीपाल सबनीस, डॉ. विजय खरे, स्वागताध्यक्ष आमदार संग्राम थोपटे यांच्या उपस्थितीत संमेलनाचे उद्घाटन होणार आहे.

‘महात्मा जोतिराव फुले यांच्या विचारातील सामाजिक क्रांती’ या परिसंवादामध्ये डॉ. दत्ता भगत, डॉ. हमीद दाभोलकर, डॉ. चंद्रकांत वाघमारे, डॉ. अनिल सपकाळ, डॉ. दत्ता पाटील, डॉ. विजय धिवार, डॉ. राजाभाऊ भैलुमे, विजय लडकत सहभागी होणार आहेत. ‘सामाजिक अत्याचार आणि जातीअंताची लढाई’ या परिसंवादामध्ये पत्रकार अनंत दीक्षित, अशोक धिवरे, डॉ. भालचंद्र कांगो, डॉ. विश्वंभर चौधरी, डॉ. नितीश नवसागरे, डॉ. शमसुद्दीन तांबोळी, उद्धव कांबळे, समीरण वाळवेकर सहभागी होणार आहेत. शिक्षणतज्ज्ञ पी. ए. इनामदार यांना डॉ. बाबासाहेब आंबेडकर कार्यगौरव राज्य पुरस्काराने गौरवण्यात येणार आहे. तालुकास्तरीय पुरस्कार अर्जुन शेलार यांना दिला जाणार आहे. संविधानकन्या मनश्री आंबेतकर हिची प्रकट मुलाखत आयोजित करण्यात आली आहे. पत्रकार उत्तम कांबळे, अतुल गोतसुर्वे, मिलिंद जोशी यांच्या उपस्थितीत संमेलनाचा समारोप होणार आहे.