पुण्यात तरुणींचं लैंगिक शोषण आणि आर्थिक लूट; २५० मुलींना फसवणारे आरोपी पोलिसांच्या ताब्यात!

पिंपरी चिंचवड : लग्न जुळवण्यासाठी अलीकडील काळात मॅट्रिमोनिअल साईट्सचा वापर वाढला आहे. मात्र याच साईट्सवरून संपर्क साधून आर्थिक फसवणुकीसह शारीरिक शोषण करणाऱ्या दोन व्यक्तींना पिंपरी चिंचवड पोलिसांनी अटक केली आहे. केंद्र शासनात मोठ्या पदावर अधिकारी असल्याचं भासवत या आरोपींनी तब्बल २५० मुलींना फसवल्याची माहिती समोर आली आहे. (Matrimonial Sites Cheating)

पोलिसांनी दिलेल्या माहितीनुसार, निशांत रमेशचंद नंदवाना आणि विशाल हर्षद शर्मा अशी अटक केलेल्या गुन्हेगारांची नावे असून त्यांनी पुण्यातील ९१ मुली बंगळुरूमधील १४२ आणि दिल्लीतील गुडगाव येथील २२ मुलींची आर्थिक फसवणूक करून या मुलींपैकी अनेकींचे शारीरिक शोषण केलं आहे.

काही दिवसांपूर्वी पुण्यातील सामाजिक कार्यकर्त्या मनीषा धारणे यांच्याकडे तीन पीडित तरुणी आल्या आणि एकाच व्यक्तीने फसवल्याचं त्यांनी सांगितलं. त्यानुसार वाकड पोलीस ठाण्यात तक्रार देण्यात आली. त्यानंतर पीआय विवेक मुगळीकर हे या घटनेचा तपास करत असताना या प्रकरणाचे धागेदोरे बंगळुरूपर्यंत पोहचले. सर्व पुरावे मिळाल्यानंतर दोन्ही आरोपींना अटक करण्यात आली. या आरोपींकडून ५० पेक्षा अधिक बनावट ओळखपत्र, अनेक मोबाईल आणि तब्बल ७५ लाखांची रोकड जप्त करण्यात आली. हे दोघेही आरोपी एकमेकांचे मित्र असल्याचंही स्पष्ट झालं आहे.

काही तांत्रिक कारणामुळे आपल्याला नोकरीतून निलंबित केलं आहे आणि परत नोकरीत घेण्यासाठी पैसे लागणार आहेत, असं खोटं सांगून या आरोपींनी अनेक तरुणींकडून लाखो रुपये उकळले होते. तसंच एका प्रकरणात मोठ्या प्रोजेक्टसाठी ६० लाख रुपये लागणार असल्याचं सांगून आरोपी निशांतने एका आयटी कंपनीतील एचआर असलेल्या तरुणीकडून तब्बल १३ लाख रुपये उकळले आणि तिचे शारीरिक शोषणही केले.

आरोपी निशांत आणि विशालची बोलण्याची पद्धत पाहून अनेक मुलींना आरोपी फार शिक्षित नसल्याचा शंका यायची. मात्र आर्थिक फसवणुकीसह काही मुलींशी या आरोपींनी शारीरिक संबंध प्रस्थापित केल्याने प्रतिष्ठेच्या भीतीने अनेक मुलींनी तक्रार केली नाही. अखेर पुण्यातील काही तरुणी समोर आल्याने या नराधमांचं कृत्य उघड झालं आहे.