अ‍ॅपशहर

वारंवार होणाऱ्या कारवाईने शहरवासीय चिंताग्रस्त

राज्य दहशतवादविरोधी पथकाच्या पुणे टीमने पुणे आणि पिंपरी-चिंचवडमधील आकुर्डीमधून तिघा संशयितांना ताब्यात घेतले. बांगलादेशात बंदी घालण्यात आलेल्या संघटनेचे हे सदस्य असून, त्यांचा 'अल कायदा'शी संबंध असल्याचा संशय देखील एटीएसला आहे.

रोहित आठवले | Maharashtra Times 19 Mar 2018, 2:51 pm
पिंपरी : राज्य दहशतवादविरोधी पथकाच्या पुणे टीमने पुणे आणि पिंपरी-चिंचवडमधील आकुर्डीमधून तिघा संशयितांना ताब्यात घेतले. बांगलादेशात बंदी घालण्यात आलेल्या संघटनेचे हे सदस्य असून, त्यांचा 'अल कायदा'शी संबंध असल्याचा संशय देखील एटीएसला आहे. मात्र, तपास यंत्रणांकडून करण्यात येणाऱ्या कारवाईत पिंपरी-चिंचवडचे नाव पुढे येत आहे, ही बाब शहरवासीयांची चिंता वाढविणारी आहे.
महाराष्ट्र टाइम्स.कॉम pimpri chinchwad resides in suspects
वारंवार होणाऱ्या कारवाईने शहरवासीय चिंताग्रस्त


पुण्यातील जंगली महाराज रस्त्यावर झालेल्या साखळी बॉम्बस्फोटातील संशयित आरोपींना दिल्ली पोलिसांनी अटक केली होती. या संशयितांचे वास्तव्य पिंपरी-चिंचवडमधील कासारवाडीमध्ये असल्याचे तपासात उघड झाले. जंगली महाराज रस्त्यावरील बॉम्ब देखील कासारवाडीतील राहत्या खोलीतच बनविण्यात आल्याचे दिल्ली स्पेशल सेलने सांगितले होते. या घटनांबरोबरच संशयित नक्षलवाद्यांच्या बड्या केडरच्या महिला लिडरला पौडमधून अटक करण्यात आली होती. तिची सहकारी भोसरीत राहत असल्याचे एटीएसने कालांतराने उघड केले. निगडी परिसराला जोडून असलेल्या कुदळवाडी परिसराकडे देखील कायमच संशयाने पाहिले जाते. मात्र, तपासात याठिकाणी कोणतीही संशयास्पद व्यक्ती किंवा घटना घडली नसल्याचे स्थानिक पोलिसांसह तपास यंत्रणांचे सांगणे असते. परंतु, या परिसरात देशातील सर्वच तपास यंत्रणा तळ ठोकून असतात.

पिंपरी-चिंचवडचा वाढता विस्तार आणि देशाच्या सुरक्षेशी संबंधित अति संवेदनशील अस्थापनांची कार्यालय शहराच्या आसपास आहेत. याचमुळे तपास यंत्रणांनी देखील पिंपरी-चिंचवडमध्ये काही वर्षांपूर्वी आपली कार्यालये थाटली आहेत. पुण्यात विभागीय कार्यालय असताना, त्याची एकशाखा (युनिट) पिंपरी-चिंचवडमध्ये सुरू करण्यात आल्यानंतरच शहरातील संवेदनशील हालचालींचा आवाका लक्षात येतो.

शहरातील अनधिकृत बांधकाम आणि गुंठा मंत्र्यांनी बांधलेल्या चाळींमध्ये अनेक विरस्त्यांचे वास्तव्य आहे. देशाच्या कानाकोपऱ्यातून पोट भरण्यासाठी आलेल्यांना कमी रक्कम स्वीकारून खोल्या भाडेतत्त्वावर दिल्या जातात; पण यातील निम्म्याहून अधिकांनी आपल्या वास्तव्याची नोंद स्थानिक पोलिस ठाण्यांमध्ये केलेली आढळून येत नाही.

शहराचे पोलिस सहआयुक्त भाडेकरून आणि कामगारांची नोंद करावी, असे आदेश देत असतात. पण याची अंमलबजावणी काटेकोरपणे होताना दिसत नाही. कासारवाडी येथे सर्वप्रथम एटीएसने कारवाई केली तेव्हा तेथील संशयितांची भोसरी पोलिस ठाण्यात नोंद नसल्याचे तपासात उघड झाले होते. हीच बाब अन्य संशयितांबाबत कायम असल्याचे दिसते. कारवाईतून वारंवार पिंपरी-चिंचवडमध्ये संशयितांचे वास्तव्य उघड होत असल्याने शहरवासीयांमध्ये चिंता आणि दहशतीचे वातावरण आहे.

स्वतंत्र आयुक्तालयाची गरज पुन्हा अधोरेखित

पिंपरी-चिंचवड शहराला स्वतंत्र पोलिस आयुक्तालयाची गरज आहे. शहरातील वाढती गुन्हेगारी, विस्तारलेला परिसर, हिंजवडी आयटी हब, औद्योगिक पट्टा आणि देशातील कानाकोपऱ्यातून येथे येणाऱ्यांमुळे लोकसंख्येचा फुगवटा यासारख्या अनेक कारणांमुळे शहराला स्वतंत्र पोलिस आयुक्तालयाची गरज आहे. राजकीय पातळीवर नेत्यांकडून निवडणुकांमध्ये स्वतंत्र आयुक्तालय प्रचाराचा मुद्दा केला जातो. पण निवडणुकानंतर अन्य घोषणा-आश्वासनांप्रमाणे आयुक्तालयाच्या मागणीकडे देखील दुर्लक्ष होताना दिसून येते. 'मटा'ने पुणे सुपरफास्ट या कार्यक्रमात शहरासाठी स्वतंत्र आयुक्तालयाची मागणी मुख्यमंत्री देवेंद्र फडणवीस यांच्याकडे केली होती. त्यांनी सकारात्मकता दाखवत हा विषय मार्गी लावण्याचे आश्वासन दिले. त्यादृष्टीने अनेक प्रशासकीय हालचाली झाल्या आहेत. एटीएसने केलेल्या कारवाईमुळे पुन्हा एकदा स्वतंत्र आयुक्तालयाची गरज अधोरेखित झाली आहे.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज