घरफोडी करणारे पालघरमध्ये अटकेत

पिंपरी : बंद घरांचा कडी-कोयंडा उचकटून चोरट्याने पिंपरी खराळवाडी आणि परिसर चोरी करणाऱ्यांना पिंपरी पोलिसांनी पालघर येथून अटक केली आहे. त्याच्याजवळून १४ तोळे सोन्यासह, एक लॅपटॉप, एक दुचाकी व एक कार असा ९ लाख २७ हजार ५०० रुपयांचा मुद्देमाल जप्त केला आहे.

राहुल ऊर्फ शेंड्या सीताराम थोरात, (२४, रा. वाकीपाटा नायगाव पूर्व, ता. वसई जि. पालघर) याच्यासह रणवीर सिंह बलबीरसिंग सहोता, (२५, रा. एमआयडीसी, भोसरी) अक्षय सोनवणे (२०, रा. रत्नदीप हाउसिंग सोसायटी, निगडी) अशी अटक करण्यात आलेल्यांची नावे आहेत. सहायक पोलिस आयुक्त राम मांडुरके व वरिष्ठ निरीक्षक डॉ. विवेक मुगळीकर, मसाजी काळे यांनी पत्रकार परिषदेत दिलेल्या माहितीनुसार, खराळवाडी आणि परिसरात घरफोडीचे गुन्हे घडले होते. त्याबाबत आरोपींनी गुन्हे केल्याची माहिती पोलिस शिपाई उमेश वानखेडे यांना खबऱ्याकडून माहिती मिळाली होती. त्यावरून मंगळवारी (२० सप्टेंबर) पालघर येथे फौजदार श्रीनिवास कामुनी, हरीश माने, बाळासाहेब आंतरकर यांच्यासह सहायक फौजदार अरुण बुधकर, हवालदार राजेंद्र भोसले, नागनाथ लकडे, शाकीर जिनेडी, विवेकानंद सपकाळे, प्रभाकर खणसे, महादेव जावळे, शैलेश मगर, दादा धस, अमोल जगताप, सुहास डंगारे, उमेश वानखेडे, संतोष भालेराव आदींची तीन पथके तयार करण्यात आली. या पथकांनी पालघर येथे आरोपी राहत असलेल्या घराला वेढा घातला होता. आरोपी सराईत असल्याने ते पळून जाण्याची दाट शक्यता लक्षात घेऊन पोलिसांनी खबरदारी घेतली होती. परंतु आरोपींनी आपल्याला घेरले गेल्याचे समजल्याने डोक्याने सिमेंटचा पत्रा फोडून छतावरून पळून जाण्याचा प्रयत्न केला. यात आरोपींच्या डोक्याला दुखापतही झाली. पोलिसांनी पाठलाग करून तिघांना अटक केली. या तिघांकडून चोरीचे अन्य गुन्हे उघडकीस येण्याची शक्यता आहे. फौजदार हरीश माने तपास करीत आहेत.