म. टा. प्रतिनिधी, पुणे
कोल्हापूरमध्ये मटका सुरू असलेल्या ठिकाणी कारवाईसाठी गेलेल्या पोलिसांवर हल्ला करून त्यांचे पिस्तूल चोरून नेल्याप्रकरणी 'मोका'नुसार दाखल गुन्ह्यात आणखी दोघांना अटक करण्यात आली आहे. या दोघांना पुणे जिल्हा न्यायालयातील मोका न्यायालयात हजर करण्यात आले असता, १९ जूनपर्यंत पोलिस कोठडी सुनावण्यात आली. अटक आरोपी मुंबईतील मटक्याचा व्यवहार देशभर सांभाळत असल्याचे निष्पन्न झाले आहे
या प्रकरणी पोलिसांनी जयेश सेवांतीलाल शहा (वय ५४ रा. पूजा रेसीडेन्सी, बोरीवली पश्चिम, मुंबई ), शैलेश गुणवंतराव मणियार (वय ६० रा. शहा भवन, बोरीवली पश्चिम) या दोघांना अटक केली आहे. या प्रकरणातील अटक दोघा आरोपींसह एकूण ३७ जणांवर गुन्हा दाखल करण्यात आला आहे. शहा हा मुंबईतील मटक्याचा व्यवहार देशभर पाहत असल्याचे निष्पन्न झाले आहे.
सलीम मुल्ला आणि त्याच्या साथीदारांकडून जप्त करण्यात आलेल्या मोबाइलमधील सिमकार्ड भलत्याच व्यक्तींच्या नावे असून, ते मोबाइल आरोपी वापरत असल्याचे समोर आले आहे. तपासात वेगवेगळ्या व्यक्तींना वेगवेगळी सांकेतिक नावे दिल्याचेही समोर आले आहे. या प्रकरणी आरोपींकडे तपास करण्यासाठी त्यांची पोलिस कोठडी देण्यात यावी, अशी मागणी सरकारी वकिलांनी केली. कोल्हापूरच्या सहायक पोलिस अधीक्षक ऐश्वर्या शर्मा यांना मिळालेल्या माहितीनुसार यादवनगर येथील टोळीप्रमुख सलीम मुल्ला आणि त्याच्या टोळीच्या मटका जुगाराच्या कार्यालयावर पोलिस कारवाई करण्यासाठी गेले होते. तेव्हा सलीम मुल्ला आणि शमा मुल्ला यांच्या सांगण्यावरून आरोपींनी बेकायदा जमाव करून पोलिसांवर हल्ला केला आणि पिस्तूल तसेच पाच राउंड घेऊन पळ काढला.