वृक्षतोडीसाठी मध्यरात्रीचा मुहूर्त

विद्यापीठ चौकात पुन्हा वृक्षतोड; परवानगी घेतल्याचा पालिकेचा दावा

म. टा. प्रतिनिधी, पुणे
आचार्य आनंदऋषीजी चौक ते ब्रेमेन चौकादरम्यानच्या रस्ता रुंदीकरणासाठी महापालिकेने शनिवारी मध्यरात्री पुन्हा काही झाडे तोडली. वृक्षतोडीस होणारा विरोध टाळण्यासाठी मध्यरात्री झाडे तोडण्यात आल्याचा आरोप वृक्षप्रेमींनी केला आहे, तर आता रुंदीकरणासाठी या रस्त्यावर पुन्हा वृक्षतोड करण्याची गरज नसल्याचा दावा महापालिकेने केला आहे.

आनंदऋषिजी चौकातील (विद्यापीठ चौक) वाहतूक कोंडी दूर करण्यासाठी या भागांत रस्ता रुंदीकरण गरजेचे होते. त्याकरिता, महापालिकेने सर्वप्रथम तब्बल शंभरहून अधिक झाडे तोडण्याचे निश्चित केले होते. त्या वेळी, पुण्याचे खासदार अनिल शिरोळे यांच्यासह वृक्षप्रेमी आणि विविध पर्यावरणवादी संस्थांनी केलेल्या आंदोलनानंतर वृक्षतोडीचा आकडा २८पर्यंत खाली आला. त्यानुसार काही महिन्यांपूर्वी काही झाडे तोडण्यात आली. तर, काही झाडे अर्धवट स्वरूपात काढण्यात आली होती. त्यामुळे, या रस्त्याच्या रुंदीकरणाच्या उर्वरित कामासाठी बाकीची झाडे काढणे आवश्यक असल्याने गेल्या काही दिवसांमध्ये रात्री हे काम करण्यात आले.

गणेशखिंड रस्त्यावर महापालिकेने पुन्हा वृक्षतोड सुरू केल्याचे कळताच, वृक्षप्रेमींनी पुन्हा त्याविरोधात आवाज उठविला. वृक्षतोड सुरू झाल्याचे कळताच रविवारी पहाटे एरिया सभा असोसिएशन ऑफ पुणेचे कार्यकर्ते घटनास्थळी दाखल झाले आणि त्यांनी विरोध केला. वृक्षप्रेमी विनोद जैन यांनी विद्यापीठाच्या कुंपणालगत असलेल्या वडाच्या फांद्या कापणाऱ्यांचे काम थांबवले.

‘महापालिकेतर्फे सुरू असलेली वृक्षतोड बेकायदा आहे. नियमबाह्य पद्धतीने झाडे तोडण्यास आमचा विरोध आहे. महापालिकेने आम्हाला २८ झाडे तोडणार असल्याचे आश्वासन दिले होते; पण त्यापेक्षा अधिक झाडे कापण्यात आली आहेत’, असा आरोप विनोद जैन यांनी केला. तर, एरिया सभा असोसिएशन ऑफ पुणे संस्थेच्या वैशाली पाटकर यांनी कोणतेही कारण न देता वृक्षतोड सुरू असून, या संदर्भात महापालिका आयुक्तांना निवेदन देणार असल्याचे सांगितले.

दरम्यान, यापूर्वी परवानगी घेतल्यानुसारच वृक्षतोड करण्यात आल्याचा दावा पुणे महापालिकेने केला आहे. काही झाडे अर्धवट स्वरूपात काढण्यात आल्याने त्याचा उर्वरित भाग रात्री हटविण्यात आल्याचा दावा पथ विभागाच्या अधिकाऱ्यांनी केला. तसेच, या रस्त्याच्या रुंदीकरणासाठी आता पुन्हा वृक्षतोड करावी लागणार नसल्याचे त्यांनी स्पष्ट केले.