कचरावेचकांसाठी ‘रेड डॉट कॅम्पेन’

महापालिका आणि ‘स्वच्छ’चा संयुक्त उपक्रम

म. टा. प्रतिनिधी, पुणे

सॅनिटरी नॅपकीन आणि डायपर हाताळल्याने कचरा वेचकांना आरोग्याचा धोका निर्माण होण्याची भीती वाढत असल्याने आता महापालिकेने ‘स्वच्छ’ संस्थेच्या सहकार्याने ‘रेड डॉट कॅम्पेन’ शहरात राबविण्याचा निर्णय घेतला आहे. त्यासाठी, शहरात मोठ्या प्रमाणात जनजागृती करण्यात येणार असून, स्वतंत्ररित्या गोळा होणाऱ्या या कचऱ्याची विल्हेवाट लावणे शक्य होणार असल्याचा दावा केला जात आहे.
शहरात एकूण गोळा होणाऱ्या कचऱ्यामध्ये सुमारे तीन टक्के प्रमाण सॅनिटरी नॅपकीन आणि डायपरचे आहे. कागदामध्ये न गुंडाळता टाकलेला हा कचरा आरोग्य सेवकांसाठी हानिकारक ठरत असल्याने नागरिकांमध्ये जागरूकता निर्माण करण्यासाठी ही मोहीम राबवले जाणार असल्याची माहिती महापालिका आयुक्त कुणाल कुमार यांनी शुक्रवारी दिली. घरगुती सॅनिटरी कचरा एका कागदामध्ये गुंडाळून त्यावर लाल बिंदू (रेड डॉट) काढण्याचे आवाहन पालिका आणि स्वच्छ संस्थेने केले आहे. यामुळे, असे चिन्ह असलेला कचरा न उघडता तो वर्गीकृत करणे सोपे होईल, असा दावा स्वच्छ संस्थेने केला. घरोघरी गोळा केल्या जाणाऱ्या कचऱ्याप्रमाणेच कंटेनरमध्ये कचरा टाकतानाही नागरिकांना ‘रेड डॉट’चा वापर करावा, यासाठी जनजागृती केली जाणार आहे.

प्लास्टिकच्या बाटल्यांवर प्रक्रिया
शहराच्या विविध भागांमध्ये मोठ्या प्रमाणावर गोळा होणाऱ्या प्लास्टिकच्या बाटल्यांचा पुनर्वापर करण्याची यंत्रणाही महापालिकेने उभारली आहे. आर्ट लाइव्ह फाउंडेशनच्या मदतीने सध्या शहरात प्लास्टिक बाटल्यांच्या संकलनासाठी ४० केंद्रे (पेट किऑस्क) उभारण्यात आली आहेत. त्याद्वारे, गोळा होणाऱ्या बाटल्यांवर प्रक्रिया करून त्याचा भुगा करण्यात येत आहे. एका दिवसात सरासरी पाच हजार बाटल्यांवर प्रक्रिया केली जात आहे. शहरातील हॉटेलर्स असोसिएशनसोबत आता सहकार्य करण्यात येत असून, मोठमोठ्या हॉटेल्समध्ये गोळा होणाऱ्या बाटल्यांवर आता थेट या प्रकल्पात येणार आहेत, असा दावा कुमार यांनी केला.