मुख्याध्यापकांविना शाळा...

शिक्षणमंडळाच्या ३५ शाळांमधील परिस्थिती
म. टा. प्रतिनिधी, पुणे
सर्वसामान्य घरातील विद्यार्थ्यांना हक्काचे शिक्षण मिळावे, यासाठी काम करत असलेल्या महापालिकेच्या शिक्षणमंडळाच्या शाळेतील सुमारे ३५ शाळांमध्ये मुख्याध्यापक नसल्याचे समोर आले आहे. यामुळे शिक्षणमंडळाच्या कारभाराचा एक नमुना चव्हाट्यावर आला आहे.
वारजे येथील कै. वनाबाई बाळासो बराटे या शिक्षणमंडळाच्या शाळेत गेल्यावर्षभरापासून तसेच न्यू अहिरे येथील कै. गुलाबराव तुकाराम वांजळे पाटील प्राथमिक शाळेमध्येही दोन वर्षापासून मुख्याध्यापक नसल्याचा आरोप माजी महापौर आणि राष्ट्रवादी काँग्रेसचे नगरसेवक दिलीप बराटे यांनी केला. शाळेत मुख्याध्यापक नसल्याने इतर शिक्षकांवर त्याची जबाबदारी पडते. मुख्याध्यापक नसल्याने शिक्षकांनाही शिस्त राहत नाही. परिणामी विद्यार्थ्यांचे नुकसान होत असल्याचे त्यांनी सांगितले.
येत्या १७ एप्रिलपर्यंत शिक्षणमंडळाने तसेच महापालिका आयुक्त कुणाल कुमार यांनी या शाळांवर मुख्याध्यापकाची नेमणूक न केल्यास १८ एप्रिलला शिक्षणमंडळात धरणे आंदोलन करण्याचा इशारा बराटे यांनी दिला आहे. मंडळात ‘राष्ट्रवादी’च्या अध्यक्षा असतानाही, अशा पद्धतीने आंदोलन करण्याची वेळ येते ही दुर्दैवी गोष्ट असल्याचे बराटे यांनी सांगितले. ‘महापालिका शिक्षणमंडळामध्ये सध्या १४५ मुख्याध्यापक आहेत. शिक्षणमंडळाच्या अनेक शाळांमधील विद्यार्थी पट कमी झाला आहे. त्यामुळे दोनशेपेक्षा कमी विद्यार्थी संख्या असलेल्या शाळांमध्ये प्रभारी मुख्याध्यापक देण्यात आले आहेत,’ असे मंडळाच्या शिक्षण उपप्रमुख शुभांगी चव्हाण यांनी सांगितले.