जागांच्या लिलावातून निधी

पीएमआरडीएच्या १० जागांचा ऑनलाइन लिलाव होणार

म. टा. प्रतिनिधी, पुणे
पुणे महानगर प्रदेश विकास प्राधिकरणाच्या (पीएमआरडीए) हद्दीत विविध विकास कामे करण्यासाठी आवश्यक निधी लवकरच जागांच्या लिलावातून उपलब्ध होणार आहे. जिल्हाधिकारी कार्यालयाकडून आणि अॅमेनिटी स्पेसच्या माध्यमातून पीएमआरडीएला प्राप्त झालेल्या १० जागांचा लिलाव आगामी काही दिवसांत घेण्यात येणार असून, त्याद्वारे पीएमआरडीएच्या तिजोरीमध्ये भर पडेल, अशी अपेक्षा आहे.

पीएमआरडीएचा २०१७-१८चा अर्थसंकल्प आठशे कोटी रुपयांचा आहे. शिवाजीनगर-हिंजवडी मेट्रो प्रकल्प, रिंगरोड, नगरररचना योजना (टीपी स्कीम) अशा अनेक प्रस्तावित विकास योजनांसाठी पीएमआरडीएला मोठ्या प्रमाणात निधीची गरज भासणार आहे. मुंबई महानगर प्रदेश विकास प्राधिकरणाच्या (एमएमआरडीए) धर्तीवर पीएमआरडीएला जागांच्या लिलावातून (लँड मॉनेटायझेशन) सक्षम करण्यावर भर असेल, असे संकेत मुख्यमंत्र्यांनी दिले होते. त्यानुसार, विविध सरकारी विभागांना त्यांच्याकडील जागा पीएमआरडीएला हस्तांतरित करण्याचे आदेश देण्यात आले होते. पीएमआरडीएकडे सध्या दोनशेहून अधिक जागा उपलब्ध झाल्या असून, त्यापैकी पहिल्या १० जागांचा ऑनलाइन लिलाव येत्या काही दिवसांत घेण्यात येणार असल्याची माहिती पीएमआरडीएचे आयुक्त आणि विशेष कार्यकारी अधिकारी (सीईओ) किरण गित्ते यांनी दिली.

मुंढवा, मांजरी, वाघोली, लोहगाव, उंड्री, पिसोळी, हिंजवडी, बावधन, म्हाळुंगे अशा वेगवेगळ्या भागांतील अनेक लहान-मोठ्या जागा पीएमआरडीएच्या ताब्यात आल्या आहेत. पहिल्या टप्प्यात सर्व मिळून ११ एकर जागा लिलावासाठी उपलब्ध होणार आहे. हॉस्पिटल अथवा शाळा यासाठीच या जागा वापरण्याचे बंधन असेल. त्यामुळे, शैक्षणिक संस्था अथवा आरोग्य सुविधा पुरविणाऱ्या क्षेत्रात काम करणाऱ्या संस्थांना ऑनलाइन लिलाव प्रक्रियेत सहभागी होता येणार आहे. हॉस्पिटल अथवा शाळेशिवाय इतर कोणत्याही प्रयोजनासाठी संबंधित जागांचा वापर करता येणार नाही, असे गित्ते यांनी स्पष्ट केले.

रेडीरेकनरच्या दरांनुसार जागांच्या लिलावासाठी मूलभूत किंमत निश्चित केली जाणार असून, त्यानंतर जास्त बोली लावणाऱ्या संस्थांना यामध्ये सहभागी होता येणार आहे. पहिल्या टप्प्यातील सर्व प्रक्रिया ठराविक कालावधीत पूर्ण झाल्यानंतर पीएमआरडीएच्या इतर जागांसाठी याच पद्धतीने ऑनलाइन लिलाव करण्यात येणार आहे. या सर्व जागा दीर्घ मुदतीच्या कराराने संबंधितांना देण्यात येणार असल्याचे गित्ते यांनी नमूद केले.