‘पीएनजी’च्या शोरूममधून लाखोंचे पेंडंट लंपास

म. टा. प्रतिनिधी, पुणे
लष्कर परिसरातील पी. एन. गाडगीळ ज्वेलर्स येथे खरेदीच्या बहाण्याने आलेल्या तीन बुरखाधारी महिलांनी साडेतीन लाखांचे हिऱ्याचे पेंडंट लंपास केल्याचा प्रकार उघडकीस आला आहे. या प्रकरणी लष्कर पोलिस ठाण्यात गुन्हा दाखल करण्यात आला आहे.
याबाबत निकीता सूर्यवंशी (वय २४, रा. कसबा पेठ) यांनी तक्रार दिली आहे. पोलिसांनी दिलेल्या माहितीनुसार, लष्कर भागात साचापीर रोडवर पी. एन. गाडगीळ ज्वेलर्स हे दागिन्यांचे शोरूम आहे. सूर्यवंशी या ठिकाणी सेल्सगर्ल म्हणून काम करतात. शनिवारी दुपारी एकच्या सुमारास बुरखा घातलेल्या तीन महिला व एक मुलगा दुकानात आले. त्यानंतर तो मुलगा बाहेर गेला. या महिलांनी त्यांना हिऱ्याचे पेंडंट घ्यायचे असल्याचे सांगितले. त्यानुसार सूर्यवंशी यांनी त्यांच्यापुढे काही दागिने ठेवले. त्या वेळी या महिलांनी त्यांच्याजवळील काही जुने दागिने मोडीत टाकायचे असल्याचे सांगितले. याबद्दल चौकशी करण्यासाठी सूर्यवंशी या ज्वेलर्सच्या व्यवस्थापकांकडे चौकशी करण्यासाठी गेल्या. त्या वेळी या महिलांनी ३ लाख ३३ हजार २६८ रूपयांचे हिऱ्याचे पेंडंट चोरून लंपास केले.