सर्पविष तस्करांना विळखा

सात जणांची टोळी खडक पोलिसांनी पकडली

म. टा. प्रतिनिधी, पुणे

सापाच्या विषाची तस्करी करणाऱ्या सात जणांच्या टोळीला खडक पोलिसांनी अटक केली असून, त्यांच्याकडून दोन कोटी रुपये किमतीचे सापाचे एक लिटर विष जप्त करण्यात आले आहे. ही टोळी महाराष्ट्र, गोवा आणि कर्नाटकात ​सक्रिय असून, त्यातील सहा जण कोल्हापूर येथील आहेत. या टोळीच्या मुख्य सूत्रधाराचा शोध घेण्यात येत आहे.

सुनील चंद्रकांत हिरेमठ (३०, रा. मु. पो. येलीमुनोळी, ता. हुक्केरी, जि. बेळगाव, कर्नाटक), पांडुरंग संभाजी पाटील (६०, रा. मेन बाजार पेठ, ता. आजरा, जि. कोल्हापूर), कृष्णा केरबा कुंभार (५०), चंद्रकांत गोविंदा लोहार (३६, दोघे रा. मु. पो. अनूर, ता. कागल, जि. कोल्हापूर), प्रकाश पांडुरंग सुतार (३५, रा. मु. पो. पांगिरे, ता. भुदरगड, जि. कोल्हापूर), प्रवीण दयानंद पाटील आणि समद फनीबंद (दोघे रा. चंदगड, जि. कोल्हापूर) यांना अटक करण्यात आल्याची माहिती परिमंडळ एकचे उपायुक्त सुधीर हिरेमठ यांनी दिली.

सापाच्या विषाच्या तस्करीसाठी काही संशयित स्वारगेट परिसरात येणार असल्याची माहिती खडक पोलिस ठाण्याचे शैलेश जगताप यांना मिळाली होती. त्यानुसार वरिष्ठ पोलिस निरीक्षक रघुनाथ जाधव, संभाजी शिर्के, फौजदार गायकवाड, अनंत व्यवहारे, जगताप, अनिकेत बाबर, इम्रान नदाफ आणि महेश बारावकर यांनी सापळा रचला आणि आरोपींना गजाआड केले.

आरोपी सुनील हिरेमठ ड्रायव्हर आहे. पांडुरंग, कृष्णा, चंद्रकांत आणि प्रकाश यांच्यासमवेत सापाच्या विषाची विक्री करण्यासाठी तो पुण्यात आला होता. या वेळी त्यांच्या ताब्यातील सापाचे एक लिटर विष आणि तवेरा गाडी जप्त करण्यात आली. या आरोपींनी गोवा, कर्नाटक आणि महाराष्ट्रातील विविध ठिकाणांवरून सापाचे विष जमा केल्याचे प्राथमिक चौकशीत निष्पन्न झाले आहे. या आरोपींनी दिलेल्या माहितीनुसार, पुणे पोलिसांनी रातोरात कोल्हापूर येथून प्रवीण पाटील आणि समद फनीबंद यांना ताब्यात घेतले. वनक्षेत्र अधिकारी सागर विलास होले यांनी दिलेल्या तक्रारीनुसार गुन्हा दाखल करण्यात आला आहे. या टोळीचा मुख्य सूत्रधार फरारी असून, त्याचा शोध घेण्यासाठी खडक पोलिसांचे पथक रवाना झाले असल्याचे सुधीर हिरेमठ म्हणाले.