म. टा. प्रतिनिधी, पुणे
पुण्यात समाजिक संस्था पोलिसांची सेवा ही श्रींची सेवा मानून काम करत आहेत. पुणेकरांनी पोलिसांबाबत राबविलेल्या उपक्रमांमुळे आमची जबाबदारी वाढली आहे, असे मत पोलिस आयुक्त के. व्यंकटेशम यांनी व्यक्त केले.
गणेशोत्सवात बंदोबस्तावर असलेल्या पोलिस अधिकारी, कर्मचारी व गणेशभक्तांच्या आरोग्यसेवेसाठी निरंजन सेवाभावी संस्थेच्या वतीने फरासखाना, विश्रामबाग पोलिस ठाण्याच्या आवारात मिनी हॉस्पिटल सुरू करण्यात आले आहे. या हॉस्पिटलचे उद्घाटन पुण्याचे पोलिस आयुक्त डॉ. के. व्यंकटेशम यांच्या हस्ते करण्यात आले. त्या वेळी डॉ. व्यंकटेशम बोलत होते. या वेळी 'निरंजन मेडिकल'चे जयेश कासट, सिद्धीविनायक एंटरप्राइजेसचे राजेंद्र जासुद, जीवन मेडिकल्सचे जयप्रकाश मुंदडा, संजीवन हॉस्पिटलचे अस्थिरोग विभाग प्रमुख डॉ. मिलिंद गांधी, पारख फार्माचे संदीप पारख, नीलेश सोनिगरा, डॉ. अनिल शर्मा, जगदीश मुंदडा, हर्षल पोफलिया, ब्रह्मानंद लाहोटी आदी उपस्थित होते.
मिनी हॉस्पिटलमध्ये सर्व प्रकारची औषधे, इंजेक्शन, सलाइन, बेड यांसह अद्ययावत सोयी-सुविधांसह महिलांसाठी स्वतंत्र विभाग उपलब्ध करण्यात आला आहे. आपत्कालीन परिस्थितीसाठी सर्व यंत्रणेसह डॉक्टर व नर्सची १८ जणांची टीम गणेशोत्सवात ११ दिवस गणेश विसर्जनापर्यंत सज्ज राहणार आहे. १३ ऑक्टोबरपर्यंत संजीवन हॉस्पिटलमध्ये रक्त तपासणी, एक्स रे, डॉक्टर तपासणीत ३० टक्के सवलत देण्यात येणार आहे. संजीवन हॉस्पिटलचे या उपक्रमाला विशेष सहकार्य लाभले आहे. गणेशोत्सवादरम्यान निवडक गरजू रुग्णांना विशेष कूपन देण्यात येणार आहे.