म. टा. प्रतिनिधी, पिंपरी
आजारपणाच्या नैराश्यातून पोलिस हवालदाराने राहत्या घरात गळफास घेऊन आत्महत्या केली. बुधवारी (१७ ऑक्टोबर) दुपारी एकच्या सुमारास वाकड पोलिस वसाहतीत हा प्रकार उघडकीस आला.
चंद्रकांत टिळेकर असे आत्महत्या केलेल्या हवालदाराचे नाव आहे. पोलिसांनी दिलेल्या माहितीनुसार, टिळेकर निगडी पोलिस ठाण्यात कार्यरत होते. नव्याने सुरू झालेल्या चिखली पोलिस ठाण्यात त्यांना वर्ग करण्यात आले होते. मात्र, मागील तीन महिन्यांपासून ते आजारपणाच्या रजेवर होते. त्यांना तोंडाचा कॅन्सर झाला होता. बुधवारी दुपारी एकच्या सुमारास टिळेकर यांच्या पत्नी कामानिमित्त घराबाहेर गेल्या. त्यानंतर टिळेकर यांनी घरात कोणी नसताना गळफास घेऊन आत्महत्या केली. त्यांच्या पश्चात पत्नी, एक मुलगा आणि मुलगी असा परिवार आहे. टिळेकर यांचा मुलगा इयत्ता नववीत शिक्षण घेत आहे. मुलगी महाविद्यालयात उच्च शिक्षण घेत आहे. आजारपणाच्या नैराश्यातून त्यांनी गळफास घेऊन आत्महत्या केल्याचा पोलिसांचा प्राथमिक अंदाज आहे. अधिक तपास वाकड पोलिस करीत आहेत.