राजेश पुराणिक निलंबित

खोटी बिले, तपास निधीचा अपहार भोवला

म. टा. प्रतिनिधी, पुणे

खर्चाची खोटी बिले सादर करणे, तपास निधीचा अपहार आदी कारणांस्तव आर्थिक गुन्हे शाखेचे पोलिस निरीक्षक राजेश पुराणिक यांचे निलंबन करण्यात आले आहे. त्यांची खात्यांतर्गत चौकशी सुरू करण्यात आली आहे. पोलिस आयुक्त रश्मी शुक्ला यांनी गुरुवारी वरील आदेश दिले.
पुराणिक आर्थिक गुन्हे शाखेत नेमणुकीला होते. आर्थिक गुन्हे शाखेत काम करण्यासाठी पोलिस कर्मचाऱ्यांची निवड करण्यात येणार होती. त्यासाठी घेण्यात येणाऱ्या परीक्षेच्या प्रश्नपत्रिका, उत्तरपत्रिका त्यांनी परीक्षार्थी पोलिसांकडून टाइप करून घेतल्या. तसेच, कार्यशाळेच्या अल्पोपहाराच्या खर्चाची आणि कागदपत्राच्या झेरॉक्स प्रतीची खोटी बिले तयार करून पोलिस आयुक्तालयाकडे सादर केली. तपास निधीच्या रकमेचा अपहार केला. काम करण्याची पद्धत ही तक्रारदार, साक्षीदार, पीडित यांना त्रासदायक असून, ती पोलिस खात्याच्या शिस्तीस धरून नाही. पुराणिक यांनी पोलिस खात्यात काम करताना बेशिस्त, बेजबाबदारपणे वागून खात्याची प्रतिमा मलीन करणारे गैरवर्तन केले. त्यामुळे विभागीय चौकशीच्या अधीन राहून त्यांचे निलंबन केल्याचे आदेशात म्हटले आहे.