नदीत उडी मारून आत्महत्येचा प्रयत्न

गस्तीवरील पोलिसाने वाचवला जीव

म. टा. प्रतिनिधी, पुणे

वडिलांशी झालेल्या भांडणातून मुलाने पूना हॉस्पिटलसमोरील यशवंतराव चव्हाण पुलावरून नदीत उडी मारल्याची घटना गुरुवारी सकाळी घडली. मुलाने उडी मारताच वडिलांनी प्रसंगावधान राखून तत्काळ घटनेची माहिती गस्तीवर असणाऱ्या पोलिसांना दिली. पोलिसांनी तातडीने पाण्यात उडी मारून मुलाला भिडे पुलाजवळून सुखरूप बाहेर काढले.
चेतन भीमराव सकट ( रा. चिंतामणी नगर, हडपसर ) असे मुलाचे नाव आहे. पोलिसांनी दिलेल्या माहितीनुसार, चेतन आणि त्याचे वडील भीमराव (वय ४३) हे रुवारी सकाळी पूना हॉस्पिटल येथे उपचारासाठी आले होते. त्यानंतर ते समोरील यशवंतराव चव्हाण पुलावर बोलत उभे होते. त्या वेळी त्यांच्यात काही कारणावरून वाद झाले. दरम्यान, चेतनने नदीत उडी मारून आत्महत्या करण्याची धमकी वडिलांना दिली. त्यानंतर त्याने सरळ पुलावरून नदीत उडी मारली. ते पाहून त्याच्या वडिलांनी आरडाओरडा केला. त्यांचा आरडाओरडा पाहून विश्रामबाग पोलिस ठाण्याचे पोलिस कर्मचारी रवींद्र साबळे तेथे आले. त्यांनीही चेतनपाठोपाठ पाण्यात उडी मारली.
खडकवासला धरणातून विसर्ग सुरू असल्याने तो भिडे पुलापर्यंत वाहत गेला. त्यानंतर साबळे आणि आजूबाजूच्या नागरिकांनी त्याला सुखरुप पाण्यातून बाहेर काढले. साबळे यांच्या पायाला जखम झाली असून, दोघांनाही उपचारासाठी ससून हॉस्पिटलमध्ये दाखल करण्यात आले.