Pune : 'एपीआय'सह पोलिस कर्मचारी निलंबित; घरझडतीदरम्यान आरोपीने पळ काढल्याप्रकरणी कारवाई

पुणे : महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केलेल्या आरोपीने पळ काढल्याप्रकरणी एका सहायक पोलिस निरीक्षकासह दोघांवर निलंबनाची कारवाई करण्यात आली आहे. मार्केट यार्ड पोलिस ठाण्यातील सहायक पोलिस निरीक्षक रामदास झुंबर मुंढे आणि पोलिस कर्मचारी महेश राजेंद्र जाधव (दोघे नेमणूक) यांचे निलंबन करण्याचा आदेश पोलिस सहआयुक्त संदीप कर्णिक यांनी काढला आहे.

असा आहे प्रकार

संतोष बाळू पवार असे पलायन केलेल्या आरोपीचे नाव आहे. तो रेकॉर्डवरील सराईत गुन्हेगार असून, त्याच्यावर ‘मकोकां’तर्गत कारवाई करण्यात आली होती. त्याला मार्केट यार्ड पोलिसांनी अटक केल्यानंतर साथीदारासह घरझडतीसाठी त्याच्या गावी खानापूर (ता. हवेली) येथे घेऊन गेले होते. त्या वेळी त्याने हातातील बेडीने पोलिसांवर हल्ला करून पळ काढला. आरोपीला तुरुंगातून बाहेर काढताना नियमानुसार दोन अधिकारी व सहा पोलिस कर्मचारी बरोबर घेणे गरजेचे असते, हा नियम पवार याच्यावेळी पाळण्यात आला नाही. वरिष्ठ अधिकाऱ्यांचीही परवानगी घेतली नाही. पोलिस कर्मचारी जाधव यांनी आरोपी साई कुंभार याच्या मोबाइलवर संपर्क करून संतोष पवार व साई कुंभार या दोघांना घरझडतीसाठी घेऊन येत असल्याचे कळविले. दोन्ही आरोपींच्या सुरक्षेबाबत खबरदारी न घेतल्याने आरोपींनी पोलिसांच्या तावडीतून पळ काढला.