हुक्का पार्लरवर छापा

म. टा. प्रतिनिधी, पुणे वानवडी परिसरातील साळुंखे विहार रोडवरील जश्न हॉटेलमधील हुक्का पार्लरवर रविवारी मध्यरात्री पोलिसांनी छापा घातला. या वेळी हुक्का पिणाऱ्या १७ तरुण आणि तीन तरुणींना ताब्यात घेऊन त्यांच्याकडे चौकशी करण्यात आली. हुक्का पार्लर चालवणारे मालक आणि मॅनेजरविरुद्ध वानवडी पोलिस ठाण्यात गुन्हा दाखल करण्यात आला.

पोलिसांनी हुक्का पार्लरमधून २९ हुक्का व २२ फ्लेवर असलेले तंबाखूचे साहित्य असा, ४० हजार रुपयांचा माल जप्त केला आहे. गुन्हे शाखेच्या दरोडा प्रतिबंधक पथकाला हुक्का पार्लर सुरू असल्याची माहिती मिळाली होती. त्यानुसार तेथे छापा घालून कारवाई करण्यात आली, अशी माहिती गुन्हे शाखेचे उपायुक्त पी. आर. पाटील यांनी दिली.

हुक्का पार्लरचे मालक महंमद सालेह अब्दुल फातीर शुक्री (रा. साळुंखे विहार) व मॅनेजर अश्रफ उमर अहमद नाकवा (वय ५३, रा. कौसरबाग सोसायटी, कोंढवा) यांच्याविरुद्ध सिगारेट व अन्य तंबाखूजन्य उत्पादने जाहिरात प्रतिबंध, तसेच पुरवठा व वितरण यांचे विनियमन कायदा, २००३ च्या कलम ४ व २१ प्रमाणे वानवडी पोलीस ठाण्यात गुन्हा दाखल करण्यात आला आहे.

दरोडा प्रतिबंधक पथकाचे वरिष्ठ पोलिस निरीक्षक राजेंद्र कदम, सहायक निरीक्षक लक्ष्मण ढेंगळे, सहायक फौजदार दीपक निकम, हरिभाऊ रणपिसे यांच्या पथकाने ही कारवाई केली.