म. टा. प्रतिनिधी, पुणे
'करोना'च्या पार्श्वभूमीवर शहरात लागू करण्यात आलेल्या संचारबंदीच्या कालावधीत नागरिकांच्या अडचणी व शंकांचे उत्तर देण्यासाठी पोलिसांनी व्हॉट्स अॅप क्रमांक सुरू केले आहेत. त्यावर नागरिकांना शंका व अडचणींची माहिती द्यावी, त्यावर नागरिकांना उत्तर दिले जाणार आहे. मात्र, नागरिकांनी विनाकारण व अनावश्यक माहिती विचारू नये, अन्यथा अशा व्यक्तींवर कायदेशीर कारवाई केली जाणार असल्याचे पोलिसांकडून स्पष्ट करण्यात आले आहे.
'करोना' आजाराच्या पार्श्वभूमीवर राज्यात संचारबंदी करण्यात आली आहे. पुण्यातदेखील संचारबंदी लागू असून, नागरिकांना रस्त्यावर फिरण्यास बंदी घालण्यात आली आहे; तसेच शहरात वाहनांनाही बंदी केली आहे. अत्यावश्यक गोष्टी केवळ याला अपवाद असतील. काही नागरिक विनाकारण वाहने घेऊन फिरत आहेत, तर घरगुती वस्तू घेण्यासाठी गर्दी करत आहेत. त्या पार्श्वभूमीवर कडक पावले उचलण्यात आली आहेत.
संचारबंदीच्या काळात नागरिकांना अनेक अडचणी, शंका येऊ शकतात. अनेक ज्येष्ठ नागरिक व रुग्णांना रुग्णालयात घेऊन जाणे किंवा इतर महत्त्वाची कामे असतात. त्या वेळी नागरिकांना अडचण होते. त्यामुळे नागरिकांना त्यांच्या शंका किंवा काही माहिती हवी असल्यास पुणे पोलिसांनी व्हॉट्स अॅप क्रमांक उपलब्ध करून दिले आहेत. त्यावरून नागरिक माहिती विचारू शकणार आहेत. मात्र, उगाच टाइमपास किंवा अनावश्यक माहिती विचारू नये, असेदेखील आवाहन करण्यात आले आहे. नागरिकांनी केलेल्या विनंतीवर विचार केल्यानंतर सवलत देण्याच्या विनंतीबाबतचे उत्तर त्याच व्हॉट्सॲप क्रमांकावरून संदेश स्वरूपात पाठवले जाणार आहे. सवलत ही केवळ अपवादात्मक परिस्थितीतच दिली जाईल, असे स्पष्ट केले आहे.
हे आहेत क्रमांक...
९१४५००३१००, ८९७५२८३१००, ९१६९००३१००, ८९७५९५३१००