म. टा. प्रतिनिधी, पुणे
शिवाजानगर पोलिस मुख्यालयात नेमणूक असलेल्या पोलिस कर्मचाऱ्याचा हृदयविकाराने रविवारी दुपारी मृत्यू झाला. कामावर असताना हृदयविकाराचा झटका आल्यानंतर त्यांना तत्काळ खासगी रुग्णालयात दाखल केले होते. मात्र, उपचार सुरू असताना त्यांचा मृत्यू झाला.
संदीप भोसले (वय ४३) असे मृत्यू झालेल्या पोलिस कर्मचाऱ्याचे नाव आहे. पोलिसांनी दिलेल्या माहितीनुसार, भोसले पोलिस मुख्यालयात नेमणुकीस होते. आरपीआय विभागात त्यांची नेमणूक होती. ते शिवाजीनगर पोलिस वसाहत येथे राहत होते. त्यांना दोन मुले आहेत. रविवारी सकाळी ते कामावर गेल्यानंतर दुपारी १२ वाजण्याच्या सुमारास अचानक त्यांच्या छातीत दुखू लागले. त्यांना तत्काळ जवळच्या खासगी रुग्णालयात उपचारांसाठी दाखल करण्यात आले. त्या वेळी त्यांना हृदयविकाराचा सौम्य झटका आल्याचे समजले. उपचार सुरू असतानाच त्यांचा मृत्यू झाला.