म. टा. प्रतिनिधी, पुणे
शहरात मंगळवारी सायंकाळनंतर झालेल्या मुसळधार पावसामुळे मध्यवस्तीपासून उपनगरापर्यंत अनेक ठिकाणी रस्त्यांवर पाणी साचून राहिल्याचे (वॉटर लॉगिंग) चित्र पाहायला मिळाले. यातील बहुसंख्य ठिकाणी बुधवारी सकाळपर्यंत पाणी ओसरले नव्हते. त्यामुळे महापालिका प्रशासनाला युद्धपातळीवर काम करून पाण्याचा निचरा करावा लागला. तसेच, शहराच्या विविध भागात इमारतींचे पार्किंग आणि घरांमध्ये पाणी शिरल्याच्या घटना घडला.
गेल्या काही दिवसांपासून तळ ठोकून असलेल्या परतीच्या पावसाने मंगळवारी सायंकाळनंतर शहरात थैमान घातले. मोठ्या प्रमाणावर पाऊस पडल्याने शहरातील प्रत्येक रस्त्यावर पाण्याचे लोट वाहत होते. विशेषतः सिमेंटच्या रस्त्यांवर पाणी साचून राहिले. अनेक रस्त्यांवर मोठ्या स्पीड ब्रेकरजवळ आणि स्मार्ट पदपथ साकारलेल्या रस्त्यांवर मोठ्या प्रमाणावर पाणी साचले. मध्यरात्री आपटे आणि जंगली महाराज रस्त्यावर मोठ्या प्रमाणावर पाणी वाहत होते. त्यामुळे दुचाकीचालकांना जीव मुठीत घेऊनच प्रवास करावा लागत होता. आगरकर रस्त्यावरही (बीएमसीसी) मोठ्या प्रमाणावर पाणी वाहत होते. वाहतूक पोलिसांकडे पाणी साचल्याच्या ४८ तक्रारी आल्या होत्या. येरवडा परिसरात वस्त्यांमध्ये आणि प्रादेशिक मनोरुग्णालयाच्या परिसरात पाणी शिरले. कात्रज येथे ओढ्याच्याकडेला असलेली सीमाभिंत पडल्याने काही ठिकाणी वस्तीत पाणी घुसले होते.
या ठिकाणी साचले पाणी
येरवडा, महाराष्ट्र हाउसिंग बोर्ड, कोंढवा, खडी मशीन चौक, येवलेवाडी, नऱ्हे, भूमकर चौक, धनकवडी, मोहननगर, येरवडा, शांतीनगर, विश्रांतवाडी, बावधन, फातिमानगर, गोखलेनगर, पोलिस वसाहत-शिवाजीनगर, अंगराज ढाबा, येरवडा, डेक्कन कॉलेज, पाषाण तलाव, अप्पा बळवंत चौक, कात्रज स्मशानभूमी, खडकी बाजार, धायरी, रायकर मळा, शिवाजीनगर, जुना तोफखाना, डेक्कन चौक, आंबेगाव स्मशानभूमी, कल्याणी नगर, मंडई, शुक्रवार पेठ, नवी पेठ.
...
तेरा ठिकाणी झाडे पडली
शहरात हडपसर, सिझन मॉल, गुरुवार पेठ चर्चजवळ, बाणेर येथे कळमकर वस्ती व भंडारी शोरूमजवळ, शिवाजीनगर, हार्डिकर हॉस्पिटल, बिबवेवाडीत चिंतामणीनगर, नवी पेठ विठ्ठल मंदिर, येरवडा, अग्रेसन भवन, नरवीर तानाजी मालुसरे रस्त्यावर (सिंहगड) अभिरुची मॉल आणि डेक्कन पोलिस ठाणे या ठिकाणी झाडे आणि झाडांच्या फांद्या पडल्या.