पुण्यामध्ये आज पावसाचा अंदाज

म. टा. प्रतिनिधी, पुणे

उकाड्याने हैराण झालेल्या पुणेकरांना गारव्याचा अनुभव देण्यासाठी सोमवारी शहरात काही भागात मेघगर्जनेसह पाऊस पडणार असल्याची शक्यता हवामान विभागाने वर्तवली आहे. आकाश अंशत: ढगाळ राहणार असले, तरी तापमानात घट होणार नाही. संध्याकाळनंतर पाऊस पडणार असल्याचा अंदाज वर्तविण्यात आला आहे.

पुण्याबरोबरच राज्यात गेल्या चार दिवसांपासून कमाल तापमानात लक्षणीय वाढ झाली असून विदर्भाच्या काही भागात गारांसह पावसाने हजेरी लावली आहे. पुण्यामध्ये रविवारी सकाळी ऊन जाणवत होते. मात्र, दुपारनंतर हवा ढगाळ होती. संध्याकाळी उपनगरांमध्ये ढग दाटून आले होते. मात्र, पाऊस पडला नाही. शहरात दिवसभरात किमान २०.२ आणि कमाल ३८. ६ अंश सेल्सिअस तापमानाची नोंद झाली. उन्हाच्या झळांपासून वाचवण्यासाठी नागरिकांनी सुट्टीच्या दिवशी सकाळी बाहेर पडण्याऐवजी घरी बसणे पसंत केले. संध्याकाळनंतर लोक वेगवेगळ्या कामांसाठी बाहेर पडले होते. या वेळी शहराच्या काही भागात वाराही सुटला होता. पुढील दोन शहरातील किमान आणि कमाल तापमानात विशेष घट होणार नाही. मात्र, सोमवारी शहरात काही भागात मेघगर्जनेसह पावसाची शक्यता आहे.

दरम्यान, राज्यात रविवारी दिवसभरात सर्वाधिक तापमान ४२ अंश सेल्सिअस मालेगाव, तर किमान तापमान १६.९ अंश सेल्सिअस तापमान उस्मानाबाद येथे नोंदविण्यात आले. पुढील दोन दिवस कोकण-मध्य महाराष्ट्र आणि मराठवाड्यात तुरळक ठिकाणी मेघगर्जनेसह पाऊस पडणार असल्याचे संकेत हवामान विभागाने दिले आहेत.