म. टा. प्रतिनिधी, पुणे
प्रगती एक्स्प्रेस येत्या ११ नोव्हेंबरपासून पुन्हा सुरू होणार आहे. खंडाळा येथील मंकी हिल ते कर्जत स्थानकादरम्यान तांत्रिक दुरुस्तीचे काम सुरू असल्याने, गेल्या दोन महिन्यांपासून प्रगती एक्स्प्रेससह पुणे-मुंबई दरम्यान धावणाऱ्या अनेक गाड्या रद्द करण्यात आल्या होत्या. आता ११ नोव्हेंबरपासून प्रगती एक्स्प्रेस पुन्हा सुरू होणार असल्याने नोकरदार, प्रवाशांची मोठी सोय होणार आहे.
मध्य रेल्वेच्या मुंबई विभागात मंकी हिल ते कर्जत स्थानकादरम्यान रुळाच्या देखभाल-दुरुस्तीची तांत्रिक कामे सुरू आहेत. त्यामुळे पुणे-मुंबई दरम्यान धावणाऱ्या प्रगती एक्स्प्रेससह सुमारे २२ रेल्वेगाड्या ऑक्टोबरपासून रद्द करण्यात आल्या होत्या. परिणामी प्रवाशांची मोठी गैरसोय होत होती. अखेर प्रशासनाने येत्या ११ नोव्हेंबरपासून प्रगती एक्स्प्रेस पुन्हा सुरू करण्याचा निर्णय घेतला आहे. त्यामुळे मुंबई-पुणे दररोज ये-जा करणाऱ्या प्रवाशांचा फायदा होणार आहे. मात्र, अन्य गाड्यांमध्ये करण्यात आलेले बदल कायम राहणार असल्याचे रेल्वेचे जनसंपर्क अधिकारी मनोज झंवर यांनी कळविले आहे.
....
'डेक्कन क्वीन'ला कर्जतचा थांबा
मंकी हिल ते कर्जत स्थानकादरम्यान रुळाच्या कामामुळे पुणे-मुंबई दरम्यानच्या अनेक गाड्या रद्द करण्यात आल्या आहेत. त्यामुळे कर्जत स्थानकावरील प्रवाशांची अडचण दूर करण्यासाठी रेल्वे प्रशासनाने डेक्कन क्वीन एक्स्प्रेसला एका मिनिटाचा थांबा दिला आहे. आजपासून (६ नोव्हेंबर) शनिवारपर्यंत (१० नोव्हेंबर) डेक्कन क्वीन कर्जत स्थानकावर एका मिनिटासाठी थांबणार आहे.
...