पारधी हत्याकांड; गुन्हेगारांवर कठोर कारवाई करा: आंबेडकर

पुणे: बीड येथे जमिनीच्या वादातून पारधी समाजातील चार जणांची हत्या करण्यात आली. वंचित बहुजन आघाडीचे नेते प्रकाश आंबेडकर यांनी या घटनेवर तीव्र संताप व्यक्त केला आहे. या हत्याकांडाची चौकशी करून आरोपींना कठोरातील कठोर शिक्षा देण्यात यावी, अशी मागणी आंबेडकरांनी केली आहे.

बीड जिल्ह्यातील अंबाजोगाई (केज) तालुक्यातील वडगाव या ठिकाणी पारधी समाजाचे पवार कुटुंब राहतात. पवार आणि निंबाळकर कुटुंबामध्ये गेल्या अनेक वर्षांपासून जमिनीचा वाद सुरू आहे. या वादातून निंबाळकर कुटुंबांनी यापूर्वीही तीन वेळा पारधी समाजाच्या लोकांवर प्राणघातक हल्ला केला आहे. मात्र, त्याची दखल घेण्यात आली नाही किंवा त्यांना पोलिस संरक्षण देण्यात आले नाही. त्याचा फायदा आरोपींनी घेतला आणि पवार कुटुंबीयांवर काल रात्री जीवघेणा हल्ला केला. त्यांचा पाठलाग करून त्यांच्यावर कुर्‍हाडीने वार करण्यात आले. बाबू पवार, प्रकाश पवार त्याची पत्नी जादुई पवार आणि संजय पवार यांचा या हल्ल्यात दुर्दैवी मृत्यू झाला, असं प्रकाश आंबेडकरांनी म्हटलं आहे.

पारधी कुटुंबातील तिघांची हत्या; बीड जिल्हा हादरला

पारधी समाज हा लढाऊ समाज असून ब्रिटिशांविरुद्ध तो स्वतंत्र सैनिकासारखा लढला, मात्र ब्रिटिशांनी त्यांना गुन्हेगारी जमात ठरवून त्यांच्यावर शिक्का मारून निघून गेले. आजही त्यांच्यावर तो शिक्का कायम आहे. तरीही हा समाज आता नव्याने उभा राहतोय. सरकारी जमिनीवर स्वतःची उपजीविका करतोय. तो आता अभिमानाने जगायला लागला आहे. ते इथल्या धर्मवादी, जातीवादी समाजाला पाहवले नाही आणि म्हणून त्यांनी या चार निष्पाप लोकांची निर्घृण हत्या घडवून आणली. या पूर्वीही या समाजवर हल्ला करण्यात आला होता. त्याची दखल घेण्यात आली नाही. शासनाला विनंती आहे की, या निंबाळकर कुटुंबाविरोधात कठोर कारवाई करण्यात यावी. उपसरपंचाला अटक करूनसह आरोपी करण्यात यावे, अशी मागणीही आंबेडकर यांनी केली आहे. वंचितचे प्रसिद्धी प्रमुख सुरेश नंदिरे यांनी एका प्रसिद्धी पत्रकाद्वारे ही माहिती दिली आहे.

देवस्थान सोने प्रकरण: 'भक्त' मीडियावर पृथ्वीराज चव्हाणांचा हल्लाबोल