म. टा. प्रतिनिधी, पुणे
गणेश विसर्जन मिरवणुकीसाठी 'महावितरण'ने जय्यत तयारी केली आहे. 'महावितरण'चे मुख्यालय आणि लक्ष्मी रस्त्यावर नियंत्रण कक्ष स्थापन करण्यात आले असून, त्या ठिकाणी २४ तास अधिकारी आणि कर्मचाऱ्यांची पथके तैनात असणार आहेत. विजेबाबत कोणतीही तक्रार आल्यास या कक्षांमधून ताबडतोब उपाययोजना केल्या जाणार आहेत.
' गणेश विसर्जन मिरवणुकीच्या काळात वीजपुरवठा खंडित होणे, शॉर्टसर्किट होणे किंवा व्यवस्थेत बिघाड होणे आदी प्रकार घडल्यास वेळीच मदत मिळण्यासाठी नियोजन करण्यात आले आहे. 'महावितरण'चे मुख्यालय आणि लक्ष्मी रस्त्यावर स्वतंत्र नियंत्रण कक्ष स्थापन करण्यात आले आहेत. या कक्षांमध्ये २४ तास अधिकारी आणि कर्मचाऱ्यांची पथके नेमण्यात आली आहेत. गणेश मंडळे किंवा नागरिकांकडून तक्रार आल्यानंतर या पथकांकडे माहिती पुरविली जाणार आहे. त्यानंतर संबंधित ठिकाणी वेळीच अधिकारी आणि कर्मचाऱ्यांचे पथक पोहोचू शकणार आहे,' असे 'महावितरण'च्या पुणे परिमंडळाचे मुख्य अभियंता सचिन तालेवार यांनी सांगितले.
' विसर्जन मिरवणूक मार्गांबरोबरच विसर्जन घाटांवर पथके असणार आहेत. विसर्जन घाटांवर पुणे महापालिकेच्या वतीने वीज व्यवस्था करण्यात आली आहे. त्या ठिकाणी 'महावितरण'चे अधिकारी आणि कर्मचारी नेमण्यात आले आहेत,' असे तालेवार यांनी स्पष्ट केले.
...
गणेश मंडळांना आवाहन
मिरवणूक मार्गांवर उच्च व लघुदाब वाहिन्या, फिडर पिलर, तसेच अन्य वीज यंत्रणा आहेत. मिरवणुकीतील वाहने किंवा देखावे हे वीज यंत्रणांपासून सुरक्षित अंतरावर राहतील, याची काळजी गणेश मंडळांनी घ्यावी, असे आवाहन 'महावितरण'कडून करण्यात आले आहे.
...
या क्रमांकांवर साधा संपर्क
विजेबाबतीत कोणतीही गरज भासल्यास 'महावितरण'च्या २४ तास सुरू असणाऱ्या १९१२ या टोल फ्री क्रमांकावर संपर्क साधावा, तसेच १८००१०२३४३५ किंवा १८००२३३३४३५ या क्रमांकांवर संपर्क साधल्यास वेळीच मदत मिळू शकणार आहे.
...
विसर्जन मिरवणूक मार्ग आणि घाटांवर 'महावितरण'ची पथके असणार आहेत. नागरिकांकडून तक्रार आल्यास ताबडतोब ही पथके घटनास्थळी पोहोचणार आहेत. लक्ष्मी रस्त्यावर तात्पुरते नियंत्रण कक्ष, तर मुख्यालयामध्ये स्वतंत्र नियंत्रण कक्ष असणार आहे.
- सचिन तालेवार, मुख्य अभियंता, 'महावितरण'