म. टा. प्रतिनिधी, पुणे
परवाना नसतानाही कोंढवा येथे सुरू असलेल्या स्वस्तिक ऑनलाइन लॉटरी सेंटरवर पोलिसांनी शुक्रवारी रात्री छापा टाकला. या ठिकाणाहून सहा कामगारांना अटक केली आहे, तर लॉटरी सेंटरचा मालक व खेळणाऱ्या आठ व्यक्ती यांच्यावर लॉटरी रेग्युलेशन अॅक्ट व जुगार प्रतिबंधक कायद्यानुसार गुन्हा दाखल करण्यात आला आहे.
संदीप चंपकलाल कहर (वय ३१, रा. धनकवडी), लखन रमेश पंडोरे (वय २३, रा. सह्याद्रीनगर), विजयकुमार शिवाजी जोडतले (वय २८, रा. मांगडेवाडी), दत्तात्रय रावसाहेब घुले (वय ३०, रा. चरवड वस्ती, वडगाव बु.), गोविंद प्रभाकर देशपांडे (वय ३१, रा. कोंढवा), नंदलाल चंपकलाल कहार (वय ३१, रा. धनकवडी) यांना अटक केली आहे. लॉटरी सेंटरचे मालक व आठ लॉटरी खेळणाऱ्यांवर गुन्हा दाखल केला आहे. या प्रकरणी उपनिरीक्षक गौतम खरात यांनी तक्रार दिली आहे.
पोलिसांनी दिलेल्या माहितीनुसार, कोंढव्यातील शिवगंगा कॉम्प्लेक्स येथे ऑनलाइन लॉटरी सुरू असल्याची माहिती पोलिसांना मिळाली होती. त्यानुसार शुक्रवारी सायंकाळी पोलिसांच्या पथकाने जाऊन पाहणी केली. त्या वेळी त्या ठिकाणी स्वस्तिक ऑनलाइन लॉटरी सेंटर व व्हिडिओ गेम येथे ऑनलाइन लॉटरी खेळण्यात येत असल्याचे आढळून आले. त्यानुसार पोलिसांनी त्या ठिकाणी छापा टाकला. त्या वेळी लॉटरी चालकाकडे लॉटरी व्यवसाय चालविण्याचा परवाना नसल्याचे आढळले; तरीही सेंटरमधील कामगार मशिनद्वारे नागरिकांना ऑनलाइन लॉटरी खेळण्यास लावत होते. यामुळे शासनाचा महसूल बुडाला आहे. या ठिकाणाहून पोलिसांच्या पथकाने ६३ हजार रुपये किमतीचे १३ व्हिडिओ गेम, सात हजार रुपयांचा स्क्रीन, ३१ हजार रुपये रोख असा एकूण एक लाख चार हजार रुपयांचा मुद्देमाल जप्त करण्यात आला आहे. त्यानुसार पोलिसांकडून गुन्हा दाखल करून, मालकाचा शोध सुरू आहे. या प्रकरणी पोलिस निरीक्षक महादेव कुंभार अधिक तपास करीत आहेत.