म. टा. प्रतिनिधी, पुणे
सावित्रीबाई फुले पुणे विद्यापीठातील बायोइन्फॉरमॅटिक्स व बायोटेक्नॉलॉजी विभागाच्या माजी विद्यार्थिनी असलेल्या प्रियंका जोशी (वय २९)यांचा 'व्होग' या जगप्रसिद्ध मासिकाने ब्रिटनमधील सर्वांत प्रभावशाली महिलांच्या यादीमध्ये समावेश केला आहे. याबरोबरच फोर्ब्स या जगप्रसिद्ध नियतकालिकाने अंडर ३० सायन्स अँड हेल्थकेअर या अंकामध्ये विविध क्षेत्रांमध्ये भरीव योगदान देणाऱ्या तरुणांच्या (३० वर्षांखालील) यादीमध्ये प्रियंका यांचा समावेश करू नुकताच त्यांच्या संशोधनात्मक कार्याचा गौरव केला होता.
प्रियंका यांनी सावित्रीबाई फुले विद्यापीठामधून पदवी व पदव्युत्तर अभ्यासक्रम पूर्ण केल्यानंतर केंब्रिज विद्यापीठामध्ये संशोधन करण्यास सुरुवात केली होती. प्रियंका यांच्या संशोधनामुळे मानवी मेंदूतील लहान रेणूंच्या औषधे आणि चयापचयांना ओळखण्यावर लक्ष केंद्रित केले गेले.
अल्झायमर रोगाचे मूळ कारण समजले जाणारे अमाइलॉइड बीटा प्रथिने क्लंप तयार होण्याशी या प्रक्रियेचा निकटचा संबंध आहे. या संशोधनांतर्गत त्यांनी लहान रेणुंचा साठा (मॉलिक्युल लायब्ररी) तयार केली. यामधून केंब्रिज विद्यापीठामध्ये अल्झायमरवरील औषध तयार करण्यासाठी सुरू करण्यात आलेल्या संशोधनास बळ मिळाले. 'व्होग'ने नुकत्याच प्रसिद्ध केलेल्या जुलैतील अंकासाठीच्या मुखपृष्ठावर प्रियंका यांना मानाचे स्थान देण्यात आले आहे. 'व्होग'ने या यादीत हॅरी पॉटर या जगप्रसिद्ध कादंबरी मालिकेच्या लेखिका जेके रोलिंग यांनाही स्थान दिले आहे.