​मिळकतकरासाठी जुन्या नोटा घेणार

पुणे : मिळकतकराच्या बिलापोटी महापालिका आता येत्या १५ डिसेंबरपर्यंत चलनातून रद्द झालेल्या जुन्या पाचशे रुपयांच्या नोटा स्वीकारणार आहे. पालिकेचा मिळकतकर भरण्यासाठी नागरिकांना या जुन्या नोटांचा वापर करता येणार आहे, अशी माहिती महापालिकेच्या मिळकतकर विभागातील अधिकाऱ्यांनी दिली.
राज्य सरकारच्या नगर विकास विभागाने या नोटा स्वीकारण्याचे आदेश महापालिकांना दिले असून शुक्रवारी रात्री हे आदेश महापालिकेला मिळाले. त्यानंतर शनिवारी विभागाने यासाठी आवश्यक असलेली परवानगी महापालिका आयुक्तांकडून मिळावी, याबाबतचा प्रस्ताव मान्यतेसाठी ठेवला होता. त्याला आयुक्त कुणाल कुमार यांनी मान्यता दिल्याने मिळकतकर भरण्यासाठी पाचशेच्या जुन्या नोटा घेतल्या जाणार आहे. महापालिकेच्या मुख्य इमारतीबरोबरच पंधरा क्षेत्रीय कार्यालयांमध्ये पालिकेने मिळकतकर भरण्याची सुविधा उपलब्ध करून दिली असल्याचे या अधिकाऱ्यांनी स्पष्ट केले.