म. टा. प्रतिनिधी, पुणे
संगीताचार्य पं. विष्णू दिगंबर पलुस्कर यांनी शंभर वर्षांपूर्वी स्वरबद्ध आणि संगीतबद्ध केलेल्या 'वंदे मातरम' या राष्ट्रीय गीताचे अनावरण गांधर्व महाविद्यालयाचे प्राचार्य प्रमोद मराठे, परिणिता मराठे आणि ज्येष्ठ संगीततज्ज्ञ डॉ. सुधा पटवर्धन यांच्या हस्ते करण्यात आले. शंभर वर्षांपूर्वीच्या प्रचलित चालीवर आधारित 'वंदे मातरम' गीताचे सादरीकरणही झाले. निमित्त होते, प्रजासत्ताक दिनाचे!
'पं. विष्णू दिगंबर पलुस्कर यांनी काफी रागात ही रचना संगीतबद्ध केली आहे. राष्ट्रप्रेमाची भावना याच रागातून योग्य पद्धतीने पोहोचवली जाऊ शकते. काफी रागाच्या स्वरांमधून भक्तीमधील शरणागत भाव अतिशय समर्पकपणे व्यक्त होतो म्हणून काफी राग हाच या शब्दांसाठी यथोचित आहे,' असे मत पलुस्कर यांनी शंभर वर्षांपूर्वी नोंदवून ठेवले आहे. पलुस्कर यांना मानवंदना आणि आदरांजली म्हणून हे गीत प्रसिद्ध करण्यात आले आहे. महाविद्यालयाच्या विष्णू विनायक स्वर मंदिर येथे झालेल्या कार्यक्रमाला लोकमान्य टिळकांचे पणतू रोहित टिळक उपस्थित होते.
हे गीत जुन्या पद्धतीने लोकांपर्यंत पोहोचवण्याची संकल्पना माधुरी संगीत विद्यालयाच्या संचालिका डॉ. माधुरी डोंगरे यांची आहे. 'नादमाधुरी' या त्यांच्या यूट्यूब चॅनलवर हे राष्ट्रीय गीत प्रसारित करण्यात आले आहे. पं. शौनक अभिषेकी आणि धनश्री गणात्रा यांनी गायलेल्या या गीतामध्ये बेला कुलकर्णी, आर्य फडके, अथर्व पटाईत आणि सर्वेश मांडे या नवोदित बालगायकांनीही सुरेल आवाजात सहभाग नोंदवला आहे.
--------------