म. टा. प्रतिनिधी, पुणे
भारतीय संगीताच्या परंपरेतील ख्यातकीर्त गायक पं. रामकृष्णबुवा वझे यांच्या रचना तरुण गायकांच्या स्वरांमध्ये ऐकता येणार आहेत. वझे बुवांच्या गायकीच्या दुर्मीळ ध्वनिमुद्रिकांमधील रचना फेसबुकद्वारे उपलब्ध करून देण्यात येत आहेत. बुवांची खापरपणती श्रुती वझे यांची ही संकल्पना आहे.
कठोर परिश्रमाने उत्तरेकडील गायकी महाराष्ट्रात आणण्याचे श्रेय ज्या मंडळींना जाते, त्यामध्ये वझे बुवांचे नाव आदराने घेतले जाते. बुवांची नुकतीच पुण्यतिथी झाली. यानिमित्त त्यांची गायकी रसिकांपर्यंत सहज पोहोचविण्यासाठी आणि बुवांना सांगीतिक आदरांजली वाहण्यासाठी हा उपक्रम राबवला जात आहे. सध्याचे युवा व प्रतिभावंत कलाकार वझे बुवांच्या संग्रहातील बंदिशी व त्यांनी संगीतबद्ध केलेल्या नाट्यपदांचे सादरीकरण करत असून, त्याच्या चित्रफिती 'मिलन गंधार' या फेसबुक पेजवर उपलब्ध करून देण्यात येत आहेत.
श्रुती वझे म्हणाल्या, 'वझेबुवांना जाऊन ७७ वर्षे लोटली; पण आजही त्यांचे गाणे आणि त्यांनी संगीत दिलेली नाट्यपदे मनावर गारूड करून आहेत. त्यांनी अनेक दुर्मीळ रागांची माहिती व चीजा स्वरलिपी व ताललिपीसह 'संगीत-कला-प्रकाश' या पुस्तकाच्या दोन भागांतून प्रकाशित केल्या. बुवांनी नऊ ध्वनिमुद्रिकांसाठी गायनही केले. यामुळे आपल्याकडे वझेबुवांचे गाणे थोड्या फार प्रमाणात तरी उपलब्ध आहे. वझे बुवांचे ध्वनिमुद्रण उपलब्ध असले, तरी ते दुर्मीळ असल्याने अस्पष्ट आहे. त्या वेळची स्वरलेखन पद्धतीही तितकीशी प्रगत नसल्यामुळे बंदिशींचे आकलन होण्याची शक्यता कमी आहे. त्यामुळेच सर्व कलाकार या बंदिशींचे व नाट्यपदांचे सादरीकरण करणार आहेत. 'शतजन्म शोधिताना', 'मर्मबंधातली ठेव ही', 'आपदा राज्यपदा', 'बोल रे पपिहरा', 'सुहास्य तुझे', 'दिव्य स्वातंत्र्य रवी', 'जल जमुना भरन', 'परवशता पाश दैवी' अशी अनेक पदे व बंदिशी कलाकार सादर करत आहेत.'
---