म. टा. प्रतिनिधी, पुणे
जैन समाजातील मुनी श्री १०८ पुलकसागरजी महाराज हे यंदा चातुर्मासानिमित्त पुणे मुक्कामी असणार आहेत. त्यांच्या स्वागतासाठी २२ जुलै रोजी मोठी मिरवणूक काढली जाणार असून, त्यात तीन हजारहून अधिक जैन बांधव सहभागी होतील, अशी माहिती सकल जैन वर्षायोग समितीच्या अध्यक्ष शोभा धारिवाल व कार्याध्यक्ष मिलिंद फडे यांनी पत्रकार परिषदेत दिली. अरविंद जैन, चकोर गांधी, आनंद गांधी, जितेंद्र शहा, अजित पाटील, सुदिन खोत, सुजाता शहा, उत्कर्ष गांधी, विरकुमार शहा या वेळी उपस्थित होते.
चातुर्मासानिमित्त पुलकसागर महाराज यांचा मुक्काम कर्वेनगर येथील महालक्ष्मी लॉन्समधील धर्मानुरागी रसिकलाल एम धारिवाल नगरीमध्ये असेल. या चातुर्मास सोहळ्यास २९ जुलै रोजी प्रारंभ होणार असून, सांगता सात नोव्हेंबर रोजी होणार आहे. या काळात प्रवचन, सत्संग, दर्शन, ग्रंथ व विशेषांक प्रकाशन, ज्ञानगंगा महोत्सव, सर्वधर्मीय चर्चासत्र, वृक्षारोपण, रक्तदान, बाल संस्कार शिबिर, आरोग्य शिबिर, प्रसाद आदी कार्यक्रम आयोजिण्यात आले आहेत.
राज्यभरातून या काळात दोन लाखांहून अधिक जैन भाविक दर्शनासाठी येतील. जिनवाणी वाहिनीवरून सर्व महत्त्वाचे कार्यक्रम व रोजच्या प्रवचने यांचे थेट प्रक्षेपण केले जाणार आहे. पाच सप्टेंबरनंतर महाराज निगडी प्राधिकरण येथील भगवान महावीर मंदिर येथे असणार आहेत,' असे शोभा धारिवाल यांनी सांगितले. दरम्यान, २२ जुलै रोजी दुपारी दोन वाजता सिंहगड रस्त्यावरील माणिकबाग जैन मंदिरापासून ते महालक्ष्मी लॉनपर्यंत पुलकसागरजी महाराज यांची मिरवणूक काढण्यात येईल. यामध्ये सनई-चौघडा,बॅन्ड पथक, ढोल पथक, लेझीमपथक याबरोबरच महिलांचे लेझीम पथकही असेल. महापौर मुक्ता टिळक व पालक मंत्री गिरीश बापट महाराजांचे स्वागत करतील.