पुण्यातील किरकिटवाडी परिसरात मायलेकीची आत्महत्या; चिठ्ठीत लिहिलं की...

पुणे: सिंहगड रस्त्यावरील किरकिटवाडी परिसरात काल मध्यरात्री आई आणि लेकीने आत्महत्या केल्याची धक्कादायक घटना उघडकीस आली आहे. संगीता दत्तात्रय खपाले (वय ४८) आणि रेवा दत्तात्रेय खपाले (वय २४) अशी आत्महत्या करणाऱ्या मायलेकींची नावं आहेत.

वाचा: मुख्याध्यापकाने घेतला शिक्षकाच्या अंगठ्याचा चावा; कारण ऐकून थक्क व्हाल!

पोलिसांनी दिलेल्या माहितीनुसार, संगीता खपाले गेल्या काही दिवसांपासून आजारपणामुळे त्रस्त होत्या. घरची आर्थिक परिस्थिती नाजूक होती. संगीता या मुलगी रेवा आणि मुलासोबत सिंहगड रस्त्यावरील किरकटवाडी परिसरात भाड्याच्या घरात राहत होत्या. गुरुवारी नेहमीप्रमाणे जेवण करून घरातील सगळे झोपले होते. रात्री एक वाजण्याच्या सुमारास मुलगा पाणी पिण्यासाठी उठला असता आई व बहिणीने गळफास घेतल्याचे त्याला दिसले. हे दृश्य पाहून त्याला धक्काच बसला. स्वत:ला सावरत त्याने लगेचच खडकवासला येथील मोठ्या बहिणीला हा प्रकार कळवला. मोठी बहीण घटनास्थळी पोहोचली. नंतर त्यांनी पोलिसांना या घटनेची माहिती दिली. घटनास्थळी पोलीस दाखल झाल्यानंतर पोलिसांना घरात एक चिट्ठी आढळून आली. त्यात आत्महत्येचे कारण नमूद करण्यात आलं आहे. 'आजारपणामुळे होणारे आईचे हाल पाहवत नाहीत, आमच्या आत्महत्येला कोणालाही जबाबदार धरू नये, पोलिसांनी घरच्यांना त्रास देऊ नये, असं चिठ्ठीत म्हटल्याचं पोलिसांकडून समजलं. दोघींचेही मृतदेह ससून रुग्णालयात शवविच्छेदनसाठी पाठवण्यात आले आहेत. या प्रकरणी अधिक तपास सुरू आहे.

वाचा: 'या' लोकांना करोना गाठणारच... इंदुरीकर महाराज नव्या वादात