पाय बांधलेल्या अवस्थेत बापाची विहिरीत बॉडी, लेकाने हंबरडा फोडला, पोलिसांना वेगळा संशय

बारामती : तालुक्यातील कोऱ्हाळे बुद्रक येथे सुनील राजाभाऊ वाबळे (वय ५०, रा. मुढाळे, ता. बारामती) या व्यक्तीचा मृतदेह एका विहिरात हात-पाय बांधलेल्या अवस्थेत आढळून आला. त्यांचा खून करून मृतदेह विहिरीत टाकला असल्याचे पोलिसांनी सांगितले.

वाबळे हे गेली अनेक वर्षे बारामती येथील डॉ. अरविंद खोमणे यांच्याकडे शेतात कामगार म्हणून काम करतात. शनिवारी (दि. १८) दुपारी त्यांचा मुलगा गणेश हा जेवणाचा डबा घेवून आला असताना आपल्या वडिलांचा मृतदेह त्याला विहिरीत आढळून आला. हात-पाय बांधलेल्या अवस्थेत हा मृतदेह असल्याने हा खूनाचाच प्रकार असल्याची शक्यता लक्षात घेत पोलिसांनी तपास सुरु केला आहे.

मृतदेह शवविच्छेदनासाठी बारामतीच्या सिल्व्हर ज्युबिली उपजिल्हा रुग्णालयात नेण्यात आला आहे. या प्रकरणी वडगाव निंबाळकर पोलिस ठाण्यात गणेश सुनील वाबळे यांनी तक्रार दिली आहे. त्यानुसार फिर्याद दाखल करून घेत अज्ञाताविरोधात खुनाचा गुन्हा दाखल केला जात असल्याची माहिती वडगाव निंबाळकरचे सहाय्यक पोलिस निरीक्षक सचिन काळे यांनी दिली.