पुण्यातील प्रचारात काळी जादू

मटा ऑनलाइन वृत्त । पुणे

महापालिका निवडणुकांचं मतदान दोन दिवसांवर आल्यानं प्रचार शिगेला पोहोचला असून प्रतिस्पर्धी उमेदवाराला जेरीस आणण्यासाठी वाट्टेल ते मार्ग अवलंबले जात आहेत. आरोप-प्रत्यारोपांपर्यंत मर्यादित असलेला प्रचार आता काळ्या जादूपर्यंत येऊन ठेपला आहे. पुण्यात एका महिला उमेदवाराविरोधात काळी जादू केली जात असल्याचं उजेडात आल्यानं खळबळ उडाली आहे.

पुणे जिल्ह्यातील पिंपरी-चिंचवड महापालिकेच्या प्रभाग क्र. ३ मधील भाजपच्या उमेदवार शैला मोळक यांच्याविरोधात काळ्या जादूचा प्रयोग झाला आहे. त्यांच्या घरात तसंच, जिथं-जिथं त्यांनी बूथ लावण्याची तयारी केली आहे, तिथं काळ्या बाहुल्या टाकण्यात आल्या आहेत. त्यामुळं तर्कवितर्कांना उधाण आलं आहे.

मोळक या पिंपरी-चिंचवड भाजपच्या महिला आघाडीच्या अध्यक्षा आहेत. सुरुवातीला त्यांचं तिकीट कापण्यात आलं होतं. त्यामुळं मोळक समर्थकांनी आमदार लांडगे यांच्याविरोधात निदर्शनं केली होती. मात्र, नंतर त्यांना तिकीट देण्यात आलं. आता त्या भाजपच्या अधिकृत उमेदवार असल्या तरी पक्षातील एका गटाचा त्यांना विरोध आहे. अधिकृत उमेदवार असूनही इतर तीन उमेदवार त्यांच्यासोबत प्रचार करताना दिसत नाहीत. अशा स्थितीत हे काळ्या बाहुल्यांचं प्रकरण घडल्यानं वेगळीच चर्चा सुरू झाली आहे.