पुणे: कार पार्क करून टेकडीवर जात असाल तर सावधान!; हे काय घडलं पाहा

पुणे: टेकडीवर फिरण्यासाठी आलेल्या नागरिकांनी पाषाण रस्त्यावरील पोलीस संशोधन केंद्र ते अभिमान श्री सोसायटी दरम्यान उभ्या केलेल्या नऊ कारच्या काचा फोडून ८५ हजार रुपयांचा ऐवज चोरून नेण्यात आल्याचा धक्कादायक प्रकार समोर आला आहे. याप्रकरणी चतुःश्रृंगी पोलीस ठाण्यात गुन्हा दाखल करण्यात आला आहे. पुणे ग्रामीण पोलीस अधीक्षक कार्यालयासमोरच हा प्रकार घडल्यामुळे खळबळ उडीली आहे. ( Pune Crime Latest News )

वाचा: खळबळ! महिलेसह लहान मुलाचा मृतदेह आढळला, महिलेचे शिर गायब

याबाबत ४७ वर्षीय व्यावसायिकाने तक्रार दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे. सकाळी सहा ते सव्वा सात दरम्यान ही घटना घडली. पोलिसांनी दिलेल्या माहितीनुसार, चतुःश्रृंगी टेकडी येथे सकाळी फिरण्यासाठी येणारे नागरिक त्यांच्या कार या पाषाण रस्ता येथे पार्क करतात. रविवारी सकाळी देखील या ठिकाणी फिरण्यासाठी आलेल्या नागरिकांनी पोलीस संशोधन केंद्र ते अभिमान श्री सोसायटी दरम्यान रस्त्यावर वाहने पार्क केली होती. सकाळी सहा ते सव्वा सातच्या सुमारास अज्ञात चोरट्याने या कारच्या काचा फोडल्या व किंमती ऐवज लांबवला.

वाचा: पुणे: तरूण मध्यरात्री दुचाकीवरून जात होता, अचानक...

तक्रारदार यांच्या कारची काच फोडून त्यातून सात हजार रुपये किंमतीचा मोबाइल, रोख रक्कम असा २२ हजार रुपये किंमतीचा मुद्देमाल चोरून नेण्यात आला. तक्रारदार यांच्या प्रमाणेच इतर नऊ कारच्या काचा फोडून ८५ हजार रुपयांचा ऐवज चोरून नेल्याचे पाहणीत समोर आले आहे. टेकडीवर फिरून आल्यानंतर नागरिकांना त्यांच्या कारच्या काचा फोडल्याचे दिसून आले. तसेच, त्यांच्या कारमधील मोबाइल व इतर ऐवज चोरून नेला होता. त्यांनी तत्काळ त्याची माहिती पोलिसांना दिली. त्यानंतर चतुःश्रृंगी पोलिसांनी घटनास्थळी धाव घेतली. याप्रकरणी गुन्हा दाखल करण्यात आला असून चोरट्याचा शोध सुरू आहे.

वाचा: मटा इम्पॅक्ट: पुण्यात 'त्या' तृतीयपंथीयांविरोधात पोलिसांची धडक कारवाई