VIDEO : 'कामधंदा नाही, घरी जा...बायको वाट बघतेय'; पुण्यात चंद्रकांत पाटील मीडियावर भडकले

पुणे : भाजप नेते आणि राज्याचे उच्च व तंत्रशिक्षण मंत्री चंद्रकांत पाटील यांनी पालकमंत्री झाल्यानंतर पहिल्यांदाच पुणे जिल्हा परिषदेची आढावा बैठक घेतली. जिल्हा परिषदेमार्फत राबवण्यात येणाऱ्या केंद्र शासनाच्या तसंच राज्य शासनाच्या योजनांच्या अंमलबजावणीचा आढावा प्रत्येक महिन्यात घेण्यात यावा, अशा सूचना पालकमंत्री चंद्रकांत पाटील यांनी दिल्या. मात्र या बैठकीनंतर चंद्रकांत पाटील हे प्रसारमाध्यमांवर चांगलेच भडकल्याचं पाहायला मिळालं.

बैठकीत नक्की काय झालं, याची माहिती घेण्यासाठी माध्यमकर्मींनी चंद्रकांत पाटील यांची प्रतिक्रिया जाणून घेण्याचा प्रयत्न केला असता पाटील यांचा पारा चांगलाच चढला. 'काम नाही, धाम नाही, घरी जा बायको वाट पाहते,' असं चंद्रकांत पाटील म्हणाले.



दरम्यान, तत्पूर्वी जिल्हा परिषदेने सर्वसामान्य व्यक्तीला केंद्रस्थानी ठेऊन विश्वस्ताच्या भूमिकेतून विकासाभिमुख कामे करावीत, अशा सूचना चंद्रकांत पाटील यांनी आज झालेल्या बैठकीत दिल्या. केंद्राच्या योजनांचा मोठ्या प्रमाणात निधी येत असतो. त्यासाठी आवश्यक प्रस्ताव गतीने तयार करणे, मंजुरीसाठी पाठवणे तसxच त्यांचा केंद्रीय पातळीवर पाठपुरावा करण्यासाठी समन्वय अधिकाऱ्याची नेमणूक करावी. केंद्र तसंच राज्याच्या अधिकाधिक योजना राबवण्यासाठी जिल्हा परिषदेने प्रयत्न करावेत, अशाही सूचना चंद्रकांत पाटील यांनी केल्या.

मुंबई शहरासाठी फडणवीसांची महत्त्वाची घोषणा, पुढच्या तीन महिन्यांत...

दरम्यान, यावेळी पालकमंत्री चंद्रकांत पाटील यांनी जिल्हा परिषदेतील विविध विभागांद्वारे राबवण्यात येत असलेल्या योजना व कामांची सविस्तर माहिती घेतली. अंगणवाडी बांधकाम, रस्ते, शाळा सुधार योजना, प्राथमिक आरोग्य केंद्रे आदींसाठी आवश्यक निधीची तरतूद केली जाईल असे सांगतानाच जनतेच्या वैयक्तिक लाभाच्या योजनांसाठी प्राधान्याने निधीची तरतूद ठेवावी, असे निर्देशही त्यांनी दिले.