सर्किट बेंच मागणीसाठी वकिलांनी पुढाकार घ्यावा

अॅड. राजेंद्र दौंडकर यांचे आवाहन

म. टा. प्रतिनिधी, पुणे
मुंबई हायकोर्टाचे खंडपीठ नाही, तर किमान सर्किट बेंच तरी पुण्याला मिळावे अशी मागणी वकील वर्गाकडून करण्यात येते आहे. सर्किट बेंचच्या मागणीला पाठिंबा मिळावा म्हणून वकील वर्गाने पुढाकार घ्यावा, असे आवाहन पुणे बार असोसिएशनतर्फे करण्यात आले आहे.

मुंबई हायकोर्टाचे खंडपीठ पुण्याला मिळावे या मागणीसाठी गेली ३९ वर्षे पुण्यातील वकील वारंवार आंदोलने आणि पाठपुरावा करत आहेत. पुण्याला मुंबई हायकोर्टाचे खंडपीठ देण्याचा प्रस्ताव विधानसभेत मंजूर करण्यात आला होता. मात्र, त्याची अद्याप अंमलबजावणीही करण्यात आलेली नाही. पुण्यातील वकिलांकडून यासंदर्भात वारंवार पाठपुरावा करण्यात येतो आहे. पुण्यातील वकिलांनी पुणे जिल्हा न्यायालयातील कामकाज सलग १७ दिवस बंद ठेवण्याचे आंदोलन केले होते. विविध प्रकारची अभिनव आंदोलने करून या मागणीकडे लक्ष वेधण्यात येते आहे. तसेच वारंवार राजकीय नेत्यांकडेही यासंदर्भात मागणी करण्यात आलेली आहे.

‘पुण्याला खंडपीठ नाही, तर किमान सर्किट बेंच तरी मिळावे, अशी अपेक्षा आता वकिलांकडून करण्यात येते आहे. खंडपीठाच्या मागणीचा पाठपुरावा करण्यासाठी नुकतेच खंडपीठ कृती समिती स्थापन करण्यात आली आहे. या समितीमध्ये पुण्यातील ज्येष्ठ वकील, पुणे बार असोसिएशनचे अध्यक्ष, सदस्य, माजी अध्यक्षांचा समावेश आहे. या समितीची मे महिन्यात एक बैठक घेण्यात आली होती. या समितीची पुढील बैठक जुलै महिन्याच्या पहिल्या आठवड्यात घेण्यात येणार आहे. खंडपीठ मागणीसाठी या बैठकीत पाठपुरावा करण्यात येणार आहे,’ अशी माहिती पुणे बार असोसिएशनचे अध्यक्ष अॅड. राजेंद्र दौंडकर यांनी दिली.

पुणे जिल्हा न्यायालय, नगर, सोलापूर, खंडाळा या परिसरातील तालुका कोर्टामध्ये प्रॅक्टीस करत असलेल्या वकिलांचा पाठिंबा मिळावा यासाठी पुणे जिल्हा न्यायालयात प्रॅक्टीस करत असलेल्या वकिलांनी पुढाकार घ्यावा. संबंधित कोर्टातील वकिलांशी संपर्क साधून त्यांचा सर्किट बेंचसाठी पाठिंबा मिळविण्यासाठी प्रयत्न करावेत, असे आवाहन अॅड. दौंडकर यांनी केले आहे.