मनोरुग्ण मुलाने आईच्या डोळ्यांत खुपसला चाकू

म. टा. प्रतिनिधी, पिंपरी

मनोरुग्ण मुलाने आईच्या दोन्ही डोळ्यात चाकू खुपसण्याचा धक्कादायक प्रकार चिंचवडमधील वाल्हेकरवाडी येथे शनिवारी (२८ एप्रिल) दुपारी दोनच्या सुमारास घडला. नेहमीच होणाऱ्या हाणामारीच्या घटनेने शेजारी नागरिकांनी देखील या प्रकाराकडे दुर्लक्ष केले. मात्र, दुसऱ्या दिवशी आईच्या डोळ्यातून रक्त येत आल्याचे पाहून एका नागरिकाने त्यांना पिंपरीतील वायसीएम हॉस्पिटलमध्ये उपचारासाठी दाखल केले.

सुमन विजय सावंत (वय ७५, रा. चिंचवड) असे जखमी झालेल्या आईचे नाव आहे. तर, भुपेंद्र विजय सावंत (३५) असे मनोरुग्ण मुलाचे नाव आहे. पोलिसांनी दिलेल्या माहितीनुसार, भुपेंद्र हा मनोरुग्ण असून, आई व वडिलांसोबत वाल्हेकरवाडी येथे राहतो. त्याला काही दिवस येरवडा येथे मनोरुग्णालयात ठेवण्यात आले होते. शनिवारी भुपेंद्रचे वडील कामानिमित्त मुंबईला गेले होते. दुपारी भुपेंद्र व त्याची आई दोघेच घरी होते. त्या वेळी भुपेंद्रने आईच्या दोन्ही डोळ्यात चाकू मारला. त्यांच्या घरात नेहमीच वाद होत असल्याने शेजाऱ्यांनीही लक्ष दिले नाही. वेदना होत असूनही जखमी आईने याबाबत वाच्यता केली नाही.

दरम्यान, रविवारी सकाळी दहाच्या सुमारास सुमन या जखमी अवस्थेत चाचपडत घराबाहेर आल्या. त्यावेळी शेजारीच राहणाऱ्या एकाने त्यांना पहिले. जवळ येऊन पहिले असता त्यांच्या डोळ्यातून रक्त येत असल्याचे दिसले. त्याने त्वरित सुमन यांना पिंपरीतील यशवंतराव चव्हाण हॉस्पिटलमध्ये दाखल केले. सुमन यांच्यावर सध्या उपचार सुरू असून, त्यांच्या दोन्ही डोळ्यांना मोठी जखम झाली आहे. भुपेंद्रचे वडील मुंबईहून तसेच बहीण नाशिकवरून आल्यानंतर आपापसात चर्चा करून तक्रार देणार असल्याचे सुमन यांनी पोलिसांना सांगितले आहे. अद्याप तरी याबाबत कोणताही गुन्हा दाखल करण्यात आलेला नाही. मात्र, सुमन यांनी तक्रार न दिल्यास वेळप्रसंगी पोलिसांकडून स्वतःहून याप्रकरणी गुन्हा दाखल केला जाईल, अशी माहिती चिंचवडचे पोलिस ठाण्याचे वरिष्ठ निरीक्षक विठ्ठल कुबडे यांनी दिली.