मेट्रोचा खर्च कमी होण्याची शक्यता

पुणे : पुणे मेट्रोचे काम सुरू असताना, जमिनीखाली सुरू असणाऱ्या खोदाईत अवघ्या सात ते आठ मीटरवर कठीण खडक लागला असून, त्यामुळे मेट्रोच्या उभारणीचा खर्च आणि वेळेत बचत होण्याचा प्राथमिक अंदाज आहे. नागपूरच्या तुलनेत पुण्यात जमिनीखाली कठीण खडक कमी खोलीवर आढळून आल्याने मेट्रोचा बांधकाम खर्च सुमारे ४० टक्क्यांनी कमी होईल, असा दावा ‘महामेट्रो’च्या वरिष्ठ अधिकाऱ्यांनी केला.

महामेट्रोतर्फे शहरात सुरू असलेल्या ‘जिओ-टेक्निकल’ सर्वेक्षणातील प्राथमिक निष्कर्षांबाबत कंपनीचे व्यवस्थापकीय संचालक ब्रिजेश दीक्षित यांनी गुरुवारी सविस्तर माहिती दिली.

‘वनाज, रामवाडी आणि पिंपरी-चिंचवड अशा तीन ठिकाणांहून जिओ-टेक्निकल सर्वेक्षणाचे काम सुरू करण्यात आले आहे. रामवाडी येथे अवघ्या सहा मीटरवर कठीण खडक लागला आहे. नागपूरमध्ये कठीण खडक शोधण्यासाठी आम्हांला २० ते २५ मीटर खोलवर जावे लागले होते. त्या तुलनेत पुण्यातील भूगर्भात कठीण खडक लवकर लागल्याने काम अधिक वेगाने करता येईल’, अशी अपेक्षा दीक्षित यांनी व्यक्त केली. या तपासणीतून मिळालेले खडकांचे काही नमुने प्रयोगशाळेत तपासणीसाठी पाठवण्यात येणार असल्याचे त्यांनी स्पष्ट केले.

जिओ-टेक्निकल सर्वेक्षण, टोपोग्राफी सर्वेक्षण यासह आता मेट्रोच्या मार्गांवरील सेवा वाहिन्या कोणत्या ठिकाणी आहेत, हे तपासण्यासाठीही सर्वेक्षण सुरू केले जाणार आहे. येत्या १५ दिवसांत सर्व सर्वेक्षणांचे अहवाल प्राप्त झाल्यानंतर पुढील कामांसाठी टेंडर प्रक्रिया सुरू केली जाईल. मेट्रोच्या प्रत्यक्ष कामास सुरुवात करण्यापूर्वीची ही विविध कामे एप्रिलपर्यंत पूर्ण होतील आणि त्यानंतर मेट्रोचे प्रत्यक्ष बांधकाम सुरू होईल, असा विश्वास त्यांनी व्यक्त केला.