‘मेट्रो’च्या विस्तारासाठी खासगी कंपन्यांना साद

पिंपरी परिसरातील कंपन्यांना खर्चाचा भार उचलण्याचे ‘महामेट्रो’चे आवाहन

Tweet: @suneetMT
पुणे : पिंपरी-चिंचवडपर्यंतची मेट्रो निगडीपर्यंत वाढवण्याची जोरदार मागणी होत असल्याने या परिसरातील अनेक मोठमोठ्या कंपन्यांचे सहकार्य मिळविण्यासाठी महाराष्ट्र मेट्रो रेल्वे कॉर्पोरेशनने (महामेट्रो) चाचपणी सुरू केली आहे. बजाज, टेल्को यासह चाकण परिसरातील महिंद्रा अँड महिंद्रा, फोक्सवॅगन, मर्सिडीज आणि इतर मोठ्या कंपन्यांनी मेट्रोच्या विस्तारासाठी आर्थिक साह्य करण्याचे आवाहन ‘महामेट्रो’ने केले आहे. या कंपन्यांनी खर्चाचा भार उचलण्याची तयारी दाखविल्यास, उर्वरित खर्च ‘महामेट्रो’कडून करण्याची तयारी दाखविण्यात आली आहे.

पुणे मेट्रो प्रकल्पाच्या पहिल्या टप्प्यात पिंपरी-चिंचवड ते स्वारगेट आणि वनाझ ते रामवाडी या दोन मार्गांना मान्यता मिळाली आहे. त्यापैकी पिंपरी-चिंचवड ते रेंजहिल्स या मार्गावरील मेट्रोच्या कामास सुरुवात झाली आहे. हे काम सुरू होण्याआधीपासून या परिसरातील सर्वांनी मेट्रोचा विस्तार निगडीपर्यंत करावा, अशी जोरदार मागणी लावून धरली आहे. निगडी ते कात्रजच्या विस्ताराला यापूर्वी राज्य सरकारने मंजुरी दिली असली, तरी त्याचा सविस्तर प्रकल्प अहवाल (डीपीआर) तयार झालेला नाही. नागरिकांचा आग्रह लक्षात घेता, या मार्गासाठी खासगी कंपन्या पुढे येऊ शकतील का, या दृष्टीने ‘महामेट्रो’ने प्राथमिक तयारी सुरू केली आहे. पिंपरी-चिंचवडचा भाग सुरुवातीपासून औद्योगिक परिसर म्हणून ओळखला जात असल्याने या भागांतील कंपन्यांनी मेट्रोच्या विस्तारित मार्गासाठी अर्थसाह्य उपलब्ध करून द्यावे, असे आवाहन ‘महामेट्रो’चे व्यवस्थापकीय संचालक ब्रिजेश दीक्षित यांनी केले आहे.

आकुर्डीतील बजाज ऑटो, चिंचवडमधील टेल्को अशा नावाजलेल्या कंपन्यांसह या भागांतील इतर मोठ्या कंपन्या आणि चाकण-तळेगाव औद्योगिक टप्प्यातील महिंद्रा, फोक्सवॅगन, मर्सिडीज अशा कंपन्यांनाही दीक्षित यांनी पत्र पाठविले असून, आर्थिक भार उचलण्याचे आवाहन केले आहे. निगडीपर्यंतच्या मेट्रोसाठी संबंधित कंपन्या काही प्रमाणात खर्च उचलण्यास पुढे आल्यास, उर्वरित खर्च ‘महामेट्रो’च्या माध्यमातून करण्याची तयारी असून, त्यासाठी सर्वतोपरी प्रयत्न केले जातील, अशी ग्वाही दीक्षित यांनी दिली.
...............
कर्मचाऱ्यांना फायदा होईल

पिंपरी-चिंचवड ते निगडी (भक्ती-शक्ती चौक) हे अंतर साधारणतः चार ते साडेचार किमीचे आहे. या टप्प्यात मेट्रोचा विस्तार करायचा झाल्यास प्रति किमी अडीचशे कोटी रुपये खर्चानुसार एक हजार कोटी रुपयांपेक्षा अधिक खर्च येण्याची शक्यता आहे. या खर्चापैकी काही निधी खासगी कंपन्यांच्या माध्यमातून उपलब्ध झाला, तर उर्वरित खर्च महामेट्रो करेल, असे संकेत दीक्षित यांनी दिले. या परिसरात कंपन्यांमध्ये काम करणाऱ्या अनेक कर्मचाऱ्यांना मेट्रोच्या विस्ताराचा फायदा होऊ शकणार असून, त्यांच्या प्रवासाच्या वेळेत बचत होईल, असा दावा त्यांनी केला.
..................

‘मेट्रोच्या विस्ताराची निकड लक्षात घेता, परिसरातील खासगी कंपन्यांनी एक पाऊल पुढे टाकावे. त्यांच्या प्रतिसादानुसार महामेट्रोही एक पाऊल पुढे टाकेल आणि सर्वांनाच त्याचा फायदा होईल.’
- ब्रिजेश दीक्षित
व्यवस्थापकीय संचालक, महामेट्रो